МАРГ анансуе мінімізацыю цэнавага рэгулявання

18 кастрычніка, Позірк. Урад распрацоўвае “альтэрнатыўную сістэму рэгулявання цэн”, заявіў 18 кастрычніка дзяржСМІ міністр антыманапольнага рэгулявання і гандлю Аляксей Багданаў.

“Асноўная задача — стварыць сістэму з найменшым умяшаннем дзяржавы ў працэсы цэнаўтварэння, але разам з тым забяспечыць стабільнае насычэнне ўнутранага рынку, развіццё эканомікі і даступныя цэны для насельніцтва на тавары”, — сказаў міністр.

Паводле яго слоў, “калі ўсё будзе добра, то новая сістэма будзе прынятая, магчыма, налета”.

Каментуючы ўнесеныя 16 кастрычніка ўрадам змены ў дзеючы парадак цэнавага рэгулявання (пятая рэдакцыя адпаведнай пастановы), кіраўнік МАРГ звярнуў увагу на ўвядзенне гранічных максімальных цэн на “так званы баршчавы набор, яблык і агуркі”: “Тут вызначаюцца як адпускныя цэны для вытворцаў, так і рознічныя ў гандлі. Гэта зроблена для таго, каб стрымліваць інфляцыйныя працэсы”.

“Яшчэ адна навіна — вывядзенне з-пад рэгулявання тавараў прэміум-класа. Няма сэнсу субсідаваць заможных людзей, якія могуць сабе дазволіць набываць такія тавары, і рэгуляваць цэнаўтварэнне”, — дадаў чыноўнік.

Як паведамляе МАРГ, пастанова Савета міністраў ад 16 кастрычніка № 713(5) уводзіць з 21 кастрычніка 2024 года па травень 2025 года гранічныя максімальныя адпускныя цэны, а з 29 кастрычніка 2024 года па травень 2025 года — гранічныя максімальныя рознічныя цэны на свежыя агуркі, яблыкі, цыбулю рэпчатую, бульбу харчовую, капусту белакачанную, буракі сталовыя, моркву, за выключэннем мытых.

Зніжаныя дзейныя надбаўкі імпарцёра на крупу грачаную, макаронныя вырабы з пшаніцы, сокі, агароднінныя, садавінагароднінныя, садавіновыя, ягадныя нектары, панчошна-шкарпэткавыя вырабы, керамічную кафлю, зубную пасту.

Выведзеныя з цэнавага рэгулявання тавары высокага цэнавага сегмента, якія адносяцца да тавараў раскошы і прэміум-класа (уключаныя ў групу 1 гандлёвых марак, прадугледжаных пастановай ДМК ад 12 лютага 2016 года № 5 “Аб вызначэнні класіфікатараў і асаблівасцей мытнага дэкларавання”).

Акрамя таго, пастаўшчыкі змогуць замаўляць у суб’ектаў гандлю паслугі па захоўванні прадукцыі, якія прадугледжваюць забеспячэнне яе якасці і захаванне спецыяльных тэмпературных рэжымаў (акрамя паслуг па захоўванні тавараў у памяшканнях, у якіх месцяцца гандлёвыя аб’екты суб’екта, што ажыццяўляе рознічны гандаль).

Адначасова прадугледжваецца, што суб’ектам, які ажыццяўляе рознічны гандаль і аказвае паслугі па захоўванні тавараў, вызначаюцца адзіныя тарыфы на такія паслугі.

6 кастрычніка 2022 года Аляксандр Лукашэнка па выніках нарады аб цэнавай сітуацыі ў краіне падпісаў дырэктыву № 10 “Аб недапушчальнасці росту цэн”.

Пастановай урада ад 19 кастрычніка 2022 года № 713 было ўведзена рэгуляванне цэн на тавары ўсяго спажывецкага кошыка. Пазней з яго былі выключаныя некаторыя групы тавараў, падкарэктаваныя правілы рэгулявання цэн.

29 снежня 2023 года была прынятая чацвёртая рэдакцыя дакумента, згодна з якой без узгаднення з дзяржорганамі дазвалялася падвышэнне цэн не больш як на 0,3% штомесяц на кантраляваныя тавары (усяго 331 пазіцыя, 124 адносяцца да харчавання, 207 — да нехарчовых тавараў).

Сёлета 19 студзеня Багданаў паведамляў, што МАРГ “ажыццяўляе рэгуляторыку практычна 85% усіх цэн, якія маюцца на спажывецкім рынку”.

Пры гэтым на прэс-канферэнцыі 24 ліпеня ён паведамляў, што сутнасць дакумента, які рэгулюе цану, не зменіцца.

Пастанову Савета міністраў № 713 чакаюць “невялікія тэхнічныя змены, неабходныя больш для ўнутранай працы ўдзельнікаў працэсу”, заявіў міністр 4 верасня.

У студзені — верасні спажывецкія цэны выраслі на 3,8%. Харчаванне стала даражэйшым на 3,7%, нехарчовыя тавары — на 3,32%, паслугі — на 4,56%.

За апошні месяц інфляцыя склала 0,44%. Харчовыя тавары падаражэлі на 0,51%, нехарчовыя — на 0,48%, паслугі — на 0,25%.

Рост цэн за 12 месяцаў (верасень да верасня) склаў 6% (на харчовыя тавары — 7,5%, нехарчовыя — 4,2%, на паслугі — 5,6%).

Паводле даных Нацбанка, цэны на садавінагароднінную прадукцыю (сезонныя тавары) у верасні выраслі на 14,9% (у жніўні — на 18,9%, ліпені — на 15,1%).

Згодна з найважнейшымі прагнознымі (дэ-факта планавымі) параметрамі развіцця краіны на 2024 год, інфляцыя не павінна перавысіць 6%.

Міжнародны валютны фонд прагназуе, што рост цэн па выніках года складзе 6%, Еўразійскі банк развіцця — 8%, Еўразійскі фонд стабілізацыі і развіцця — 5,8%.

У 2023 годзе цэны выраслі на 5,8%.