Камандуючы войскамі ВПС і СПА анансаваў правядзенне ў верасні 2025 года “сумеснага стратэгічнага вучэння”
28 кастрычніка, Позірк. У верасні 2025 года на тэрыторыі Беларусі пройдзе “сумеснае стратэгічнае вучэнне-2025”, заявіў у эфіры тэлеканала СТБ камандуючы Ваенна-паветранымі сіламі і войскамі супрацьпаветранай абароны Узброеных сіл Андрэй Лук’яновіч.
Паводле яго слоў, вучэнні стануць “вынікам баявой падрыхтоўкі”, у рамках якой “запланаваныя аператыўныя тактычныя вучэнні з баявой стральбой як на палігонах Расійскай Федэрацыі, так і на тэрыторыі Рэспублікі Беларусь”.
“Запланаваныя сумесныя лётна-тактычныя вучэнні. Пакуль не буду раскрываць з кім, таму што пацверджання пакуль яшчэ чакаем”, — сказаў Лук’яновіч.
Верагодна, пад “сумесным стратэгічным вучэннем-2025” афіцэр мае на ўвазе беларуска-расійскія вучэнні “Захад-2025”, аб правядзенні якіх заявіў кіраўнік беларускага абароннага ведамства Віктар Хрэнін на пасяджэнні сумеснай калегіі міністэрстваў абароны Беларусі і Расіі 23 кастрычніка ў Мінску. Паводле слоў міністра, яны створаць умовы для “далейшага ўдасканалення дзеючай сістэмы забеспячэння ваеннай бяспекі Саюзнай дзяржавы”.
“Мерапрыемствы такога маштабу дазваляюць на практыцы праверыць узровень баявой гатоўнасці рэгіянальнай групоўкі і здольнасць войскаў сумесна выконваць пастаўленыя задачы”, — сказаў чыноўнік.
10–20 лютага 2022 года ў Беларусі праводзіліся сумесныя вучэнні “Саюзная рашучасць”. Насуперак запэўненню Уладзіміра Макея, які займаў тады пасаду міністра замежных спраў (памёр 26 лістапада 2022 года), у тым, што пасля манеўраў усе расійскія войскі пакінуць беларускую тэрыторыю, гэтага не адбылося. 24 лютага РФ пачала поўнамаштабную вайну супраць Украіны, выкарыстаўшы для ўварвання ў тым ліку сілы, якія знаходзіліся ў Беларусі.
Спікер Дзяржаўнай памежнай службы Украіны (ДПСУ) Андрэй Дземчанка дапусціў магчымасць перамяшчэння падчас вучэнняў “Захад-2025” войскаў праціўніка да ўкраінскай мяжы.
