На мяжы з Польшчай знойдзена 15 збітых мігрантаў, сцвярджае СК

29 кастрычніка, Позірк. У Гродзенскім раёне 29 кастрычніка паблізу польскай мяжы беларускія пагранічнікі выявілі 15 “знясіленых і збітых” мігрантаў з Алжыра, Сірыі і Самалі, паведамляе Следчы камітэт.

“Улады Польшчы працягваюць палітыку генацыду і ксенафобіі ў дачыненні да ўцекачоў”, — сцвярджае СК.

Пацярпелыя, як сцвярджаецца, расказалі следчым, што ўсе яны накіроўваліся ў Польшчу. “На польскім баку (СК замоўчвае, якім чынам бежанцы перасеклі мяжу і апынуліся на сумежнай тэрыторыі, — “Позірк”.) людзі ў форме збілі іх і, пад пагрозай расправы, літаральна выкінулі праз брамку для жывёл у Беларусь. Пры гэтым на збіцці прыхільнікі польскіх улад не спыніліся, на замежнікаў нацкавалі службовых сабак, пра што сведчаць сляды ад укусаў, ранкі і гематомы на іх целах. Пасля гэтых зверстваў польскі бок прымяніў пярцовы газ і траўматычную зброю, нягледзячы на ​​маленні аб дапамозе”, — гаворыцца ў прэс-рэлізе.

Падкрэсліваецца, што дзеянні службовых асоб сумежнага боку, якія названы “злачыннымі”, старанна дакументуюцца, і міжраённым аддзелам СК будзе дадзена “прынцыповая прававая ацэнка таму, што адбылося”.

23 кастрычніка Дзяржпагранкамітэт Беларусі заявіў, што ў Камянецкім раёне “паблізу польскага плота” было знойдзена цела “бежанца з Бангладэш”.

У ДПК абвінавацілі ўлады Польшчы ў тым, што яны “маюць намер афіцыйна адмяніць правы на прытулак, у рэчаіснасці ўжо пазбавілі ўцекачоў права на жыццё”. Польская міграцыйная палітыка, падкрэслілі там, “са студзеня забіла шэсць уцекачоў, а з 2021 года на мяжы з Польшчай знойдзены 27 трупаў замежнікаў”.

У сваю чаргу Міністэрства нацыянальнай абароны Польшчы “рашуча адпрэчыла” абвінавачанні ў смерці мігранта.

Беларускія ўлады рэгулярна паведамляюць аб пакутах, фізічных траўмах і гібелі замежнікаў на мяжы з краінамі ЕС, нязменна ўскладаючы адказнасць за гэта на супрацоўнікаў сілавых ведамстваў Польшчы, Літвы і Латвіі.

Міграцыйны крызіс на мяжы Беларусі і краін ЕС прадаўжаецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.

27 кастрычніка 2023 года, каментуючы плыні нелегальнай міграцыі з Беларусі ў краіны Еўразвяза, Аляксандр Лукашэнка заявіў: “Мы не адстойнік, мы нікога тут лавіць не будзем. Тым больш вы (краіны Захаду. — “Позірк”.) іх паклікалі. Няхай ідуць”.

Частковае прыпыненне права на прытулак у сувязі з крызісам на мяжы прапанавана новай міграцыйнай стратэгіяй Польшчы, прынятай 15 кастрычніка.