У літоўскім Мядзінінкаі прыпынена афармленне грузавікоў — ДПК

6 лістапада, Позірк. Паводле інфармацыі літоўскага боку, 6 лістапада ўезд фур у пункт пропуску Мядзінінкай (з беларускага боку — Каменны Лог) прыпынены з прычыны абнаўлення праграмнага забеспячэння, паведамляе Дзяржаўны пагранічны камітэт.

Завяршэнне работ запланавана на 12.00.

Пры гэтым афармленне легкавога транспарта і аўтобусаў не спынялася.

ДПК рэкамендуе грузаперавозчыкам улічваць дадзеную інфармацыю пры планаванні паездак у Літву.

Паводле звестак ДПК, у чарзе на літоўскім пагранпераходзе Мядзінінкай (Каменны Лог) на 10 раніцы знаходзіцца 120 грузавых аўтамабіляў.

ДПК адзначае, што з 5 лістапада супрацоўнікі пагранпераходу аформілі 16% аўтамабіляў ад нормы. Праз Шальчынінкай (Беняконі) з пачатку тыдня ў Літву ўехала 36% грузавікоў.

Колькасць легкавых аўто перад польскім пунктам пропуску Цярэспаль (Брэст) павялічылася амаль у два разы — па стане на 10.00 у чарзе знаходзіцца 1.335 адзінак транспарту. Сумежны бок працягвае прымаць на сваю тэрыторыю не больш за 40% аўто ад нормы. Перад названым пагранпераходам уезду ў Польшчу чакаюць 40 аўтобусаў.

Польскі напрамак з’яўляецца самым загружаным на шляху ў Еўрасаюз і для фур — уезду на сумежную тэрыторыю перад пагранпераходам Кукурыкі (Казловічы) чакаюць 600 велікагрузаў. Сумежны бок з панядзелка прапусціў усяго 52% транспарту ад нормы.

Перад латвійскім пагранпераходам Патэрніекі (Грыгараўшчына) на ўезд у ЕС фіксуецца 300 грузавікоў. Ягоныя кантрольныя службы прынялі на сваю тэрыторыю 45% аўто.

Краіны ЕС закрылі частку пунктаў пропуску на граніцы з Беларуссю з-за абвастрэння адносін з Мінскам пасля падзей 2020 года.

Закрыццё сумежных пунктаў пропуску з беларускім бокам звязана сярод іншага з міграцыйным крызісам на граніцы Беларусі і краін ЕС, які прадаўжаецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.

Пасля вынясення палітычна матываванага прысуду журналісту Анджэю Пачобуту (8 гадоў пазбаўлення волі) 10 лютага 2023 года Польшча на нявызначаны тэрмін закрыла адзін з двух даступных для падарожнікаў пунктаў пропуску — Баброўнікі (з беларускага боку Бераставіца). Улады Польшчы наўпрост заяўлялі, што менавіта з вызваленнем палітвязня можа быць звязанае адкрыццё пунктаў пропуску.