Затрыманы чарговы грамадзянін Украіны, які спрабаваў увезці з Польшчы гашыш

11 лістапада, Позірк. Аб затрыманні яшчэ аднаго грамадзяніна Украіны пры спробе ўвозу ў Беларусь забароненых рэчываў паведамляе Дзяржаўны памежны камітэт (ДПК).

Адзначаецца, што затрыманне праведзена 10 лістапада ў пункце пропуску “Брэст” пры праходжанні памежнага кантролю.

Ва ўкраінскага грамадзяніна, які рухаўся з Польшчы, выяўлена “рэчыва расліннага паходжання цёмна-зялёнага колеру агульнай масай 0,13 грама”. Экспертыза ўстанавіла, што гэта гашыш.

ДПК таксама паведамляе, што “агляд паказаў у мужчыны станоўчы тэст на марыхуану”.

“За незаконнае перамяшчэнне праз мяжу і незаконны абарот наркатычнага сродку ў дачыненні да грамадзяніна Украіны распачатыя крымінальныя справы паводле ч. 1 арт. 328¹ (незаконнае перамяшчэнне праз мытную мяжу Еўразійскага эканамічнага саюза і (або) дзяржаўную мяжу Рэспублікі Беларусь наркатычных сродкаў, псіхатропных рэчываў альбо іх прэкурсораў або аналагаў) і ч. 1 арт. 328 (незаконны абарот наркатычных сродкаў, псіхатропных рэчываў, іх прэкурсораў і аналагаў) Крымінальнага кодэкса. Максімальнае пакаранне за гэтыя злачынствы прадугледжвае да 8 гадоў пазбаўлення волі. Затрыманы змешчаны ў ізалятар часовага ўтрымання Брэсцкай памежнай групы”, — гаворыцца ў паведамленні ведамства.

Аб аналагічным выпадку, таксама з грамадзянінам Украіны, ДПК паведаміў 28 кастрычніка. Тады ў пункце пропуску “Брэст” пры праходжанні мытнага надгляду затрыманы “выкінуў пакет”, які быў у яго пры сабе, аднак на гэта “адрэагаваў службовы сабака”. Гаворка таксама ішла пра гашыш, аднак справа была ўзбуджаная толькі паводле ч. 1 арт. 328¹ КК.

У 2023 годзе мытнымі органамі “было выяўлена каля 400 фактаў незаконнага перамяшчэння праз мытную мяжу наркатычных сродкаў і псіхатропных рэчываў”, паведаміў на прэс-канферэнцыі ў Мінску 23 верасня начальнік галоўнага ўпраўлення па наркакантролі і супрацьдзеянні гандлю людзьмі МУС Алег Сільвестровіч.

“Было ўзбуджана 275 крымінальных спраў. З незаконнага абароту было канфіскавана больш за 800 кг наркатычных сродкаў і псіхатропных рэчываў”, — сказаў ён.

Палата прадстаўнікоў 17 верасня прыняла ў першым чытанні законапраект “Аб змяненні кодэксаў па пытаннях крымінальнай адказнасці”. Дакумент змяшчае змены ў Крымінальны, Крымінальна-працэсуальны, Крымінальна-выканаўчы кодэксы, а таксама Кодэкс аб адміністрацыйных правапарушэннях і Працэсуальна-выканаўчы кодэкс аб адміністрацыйных правапарушэннях.

Папраўкі ўтрымліваюць “альтэрнатыўныя больш мяккія пакаранні” ў выглядзе арышту на тэрмін да трох месяцаў за набыццё або захоўванне наркотыкаў (ч. 1 арт. 328 КК); абмежаванні свабоды за разавыя выпадкі іх збыту (ч. 2 арт. 328). У цяперашні час ч. 1 прадугледжвае пакаранне ў выглядзе абмежавання волі на тэрмін да 5 гадоў або пазбаўлення волі на тэрмін ад 2 да 5 гадоў, ч. 2 — пазбаўленне волі на тэрмін ад 5 да 8 гадоў са штрафам або без яго.

Прапануецца паменшыць ніжні памер пакарання за збыт наркотыкаў у складзе арганізаванай групы з 10 да 8 гадоў пазбаўлення волі (ч. 4 арт. 328).