12 верасня, Позірк. Налета Мінск плануе распачаць будаўніцтва аграгарадка ў Карабаху, заявіў агенцтву Report амбасадар Беларусі ў Азербайджане Дзмітрый Піневіч.
“Мы завершым у 2027 годзе праектаванне аграгарадка разам з некаторымі аграпрамысловымі комплексамі. І калі ўсё будзе добра, то ў 2027 годзе плануем там пачынаць сумеснае будаўніцтва”, — сказаў дыпламат, дадаўшы, што ў тым жа годзе плануецца размясціць у Агдаме сумесную вытворчасць ліфтаў.
У кастрычніку 2024 года міністр сельскай гаспадаркі Азербайджана Меджнун Мамедаў і Анатоль Ліневіч, які тады ўзначальваў Міністэрства сельскай гаспадаркі і харчавання Беларусі, падпісалі дарожную карту з “сумеснымі захадамі па развіцці вытворчасці сельскагаспадарчай прадукцыі”. Дакумент сярод іншага прадугледжваў “развіццё сельскагаспадарчай вытворчасці ў Агдамскім раёне”, а таксама “праектаванне аграгарадка ў сяле Гызыл-Кенгерлі”.
Большая частка Агдамскага раёна — тэрыторыі, якую Баку лічыў сваёй, а ААН разглядала як частку Азербайджана, — у 1993–2020 гадах знаходзілася пад кіраваннем непрызнанай Нагорна-Карабахскай Рэспублікі (НКР). Еўрапейскі суд па правах чалавека ў 2015 годзе прыйшоў да высновы, што эфектыўны кантроль над Нагорным Карабахам і навакольнымі тэрыторыямі ажыццяўляла Арменія.
Сяло Гызыл-Кенгерлі дэ-факта ўваходзіла ў Мартакертскі раён НКР пад назвай Нор-Марага. У лістападзе 2020 года яна разам з астатняй часткай Агдамскага раёна, якая кантралявалася армянскім бокам, была перададзеная пад кантроль Баку ў адпаведнасці з трохбаковай заявай, падпісанай прэзідэнтам Расіі Уладзімірам Пуціным, прэзідэнтам Азербайджана Ільхамам Аліевым і прэм’ер-міністрам Арменіі Ніколам Пашынянам.
Падчас апошняга карабахскага ваеннага канфлікту (першая фаза — восень 2020 года, другая — восень 2023-га) улады Беларусі фактычна падтрымалі Азербайджан, а не Арменію — сваю саюзніцу па шэрагу інтэграцыйных аб’яднанняў, у тым ліку па Арганізацыі Дагавора аб калектыўнай бяспецы (АДКБ). У выніку канфлікту НКР спыніла існаванне, а тэрыторыі, якія яна кантралявала, перайшлі пад кантроль Баку.
Пазіцыя саюзнікаў Арменіі падчас канфлікту стала адным з фактараў рэзкага пагаршэння стасункаў Ерэвана з Мінскам і АДКБ агулам.
