Міліцыя арганізавала ў Віцебску “працоўную тэрапію” для непрацуючых — іх адправілі ў заапарк прыбіраць тэрыторыю
6 кастрычніка, Позірк. Пра “працоўную тэрапію” для непрацуючых грамадзян 6 кастрычніка паведаміла УУС Віцебскага аблвыканкама.
Адзначаецца, што Кастрычніцкі РАУС Віцебска праводзіць “сістэмную работу па працоўнай адаптацыі грамадзян, якія стаяць на ўліку ў крымінальна-выканаўчай інспекцыі і аддзеле аховы правапарадку і прафілактыкі”.
“Чарговая грамадска карысная праца прайшла ў гарадскім заапарку”, — гаворыцца ў паведамленні.
“Падуліковыя грамадзяне працавалі на тэрыторыі заапарка: добраўпарадкавалі дарожкі і прыбралі апалае лісце. Для многіх з іх гэта не проста грамадска карысная праца, а магчымасць зноў адчуць сябе часткай калектыву і вярнуцца да звыклага рытму жыцця”, — рапартавалі ва УУС.
Паводле слоў начальніка крымінальна-выканаўчай інспекцыі Канстанціна Ярашэўскага, “праца з падапечнымі” вядзецца ў РАУС штодня — “іх не толькі прыцягваюць да працы, але і дапамагаюць сацыялізавацца, вярнуцца да нармальнага жыцця крок за крокам”.
“Гэта не проста “працоўная тэрапія”, гэта спосаб вярнуцца да нармальнага жыцця і зноў адчуць сябе патрэбным у грамадстве. Большасць асуджаных хоча выправіцца, і такія мерапрыемствы становяцца першым крокам на гэтым шляху”, — сказаў Ярашэўскі.
“Працоўная адаптацыя”, як заявілі ва УУС, з’яўляецца “адным з ключавых напрамкаў прафілактычнай работы”. Яна, як сцвярджаецца, “дазваляе не толькі заняць грамадзян карыснай дзейнасцю, але і знізіць рызыку паўторных правапарушэнняў, фарміруючы ў іх адказнае стаўленне да працы і грамадства”.
