Ціханоўская заклікала даць Украіне “ўсё неабходнае” для перамогі над РФ

17 лістапада, Позірк. “Відавочным тэрарыстычным актам” назвала дэмакратычны лідар Святлана Ціханоўская масіраваны ўдар Расіі па Украіне 17 лістапада.

Гэты ўдар, падкрэсліла палітык у сацсетцы Х, накіраваны “супраць грамадзянскага насельніцтва і крытычна важных аб’ектаў інфраструктуры”.

“Украіна павінна атрымаць усё неабходнае для перамогі. Беларусы падтрымліваюць Украіну ў яе гераічнай барацьбе за свабоду”, — напісала Ціханоўская.

У ноч на 17 лістапада Расія атакавала Украіну ракетамі і дронамі, мэтай удару сталі ў асноўным аб’екты крытычнай інфраструктуры. Украінскія ўлады назвалі атаку адной з найбуйнейшых з пачатку вайны.

Паводле даных украінскага боку, расіяне выпусцілі 120 ракет і 90 БПЛА. Сілы СПА УСУ знішчылі больш за 140 паветраных цэляў.

Камандаванне Паветраных сіл УСУ ўдакладніла, што ўдалося збіць сем з васьмі гіпергукавых ракет “Кінжал” і адну гіпергукавую ракету “Цыркон”, а таксама 89 крылатых ракет і пяць авіяцыйных.

Паведамляецца пра пяць загінулых. У Мікалаеве пры атацы БПЛА загінулі дзве жанчыны, мужчыны 41 і 44 гадоў загінулі ў Адэскай вобласці, у Львоўскай вобласці забітая 66-гадовая пенсіянерка. Паведамляецца таксама пра вялікую колькасць параненых.