Беларус і трое расіян вызваленыя ў Чадзе

17 лістапада, Позірк. Трое грамадзян Расіі і беларус, раней затрыманыя на тэрыторыі Чада, вызваленыя, паведамляе інфармагенцтва ТАСС.

“Амаль два месяцы іх незаконна трымалі ў СІЗА Нджамены”, — прыводзіць агенцтва словы віцэ-прэзідэнта расійскага падраздзялення Міжнароднага камітэта абароны правоў чалавека Івана Мельнікава.

Аб затрыманні ў Рэспубліцы Чад грамадзяніна Беларусі і трох грамадзян Расіі паведаміла 24 верасня Міністэрства замежных спраў РФ.

Паводле даных знешнепалітычнага ведамства, 19 і 21 верасня ў Нджамене — сталіцы гэтай дзяржавы ў Цэнтральнай Афрыцы (мяжуе з Камерунам, Лівіяй, Нігерыяй, Нігерам, Суданам і Цэнтральнаафрыканскай Рэспублікай) — узятыя пад варту беларус Дзенісевіч А. А., расіяне Шугалей М. А., Суэйфан С. Хасан Алі, Цароў Е. І.

Прычыны затрымання, а таксама тое, кім з’яўляюцца гэтыя людзі, не паведамляліся. Пазней Шугалея і Суэйфана расійскія СМІ сталі называць “сацыёлагамі”.

10 снежня 2020 года ТАСС паведамляў, што “расійскія грамадзяне, супрацоўнікі Фонду абароны нацыянальных каштоўнасцяў Максім Шугалей і Самер Хасан Алі Суэйфан, затрыманыя ў 2019 годзе ў Лівіі, вызваленыя з турмы”.

Шугалей знаходзіцца пад санкцыямі ЕС, Украіны і Канады за сувязі з прыватнай вайсковай кампаніяй “Вагнер”. Заяўлялася, што ён уключаны ў спісы “за аказанне садзейнічання і падтрымкі дзеянням групы “Вагнер” з дапамогай прапаганды і дэзінфармацыі”.