Брэсцкі ўрач Цімур Лозка і яшчэ пяць чалавек прызнаныя палітвязнямі

24 лістапада, Позірк. Шэсць зняволеных атрымалі статус палітычных паводле рашэння праваабарончай супольнасці ад 23 лістапада. Іх агульная колькасць дасягнула 1.274.

У адпаведны спіс уключаныя асуджаныя да пазбаўлення волі:

Цімур Лозка (брэсцкі анестэзіёлаг-рэаніматолаг) — па арт. 290¹ КК (фінансаванне тэрарыстычнай дзейнасці) за ахвяраванне пратэстнай ініцыятыве (8 гадоў пазбаўлення волі);

Максім Рэмезаў (супрацоўнік аператара мабільнай сувязі А1) — па арт. 361² (фінансаванне экстрэмісцкай дзейнасці) і 361³ (удзел на тэрыторыі замежнай дзяржавы ва ўзброеным фарміраванні або ўзброеным канфлікце, ваенных дзеяннях, вярбоўка альбо падрыхтоўка асоб да такога ўдзелу) за ахвяраванні пратэстным ініцыятывам і беларускім добраахвотнікам у складзе Узброеных cіл Украіны (прысуд невядомы);

Міхаіл Фандо (удзельнік чэмпіянатаў па покеры) — па арт. 361³ за ахвяраванні беларускім добраахвотнікам у складзе Узброеных cіл Украіны (5 гадоў пазбаўлення волі);

Сяргей Скібінскі (дырэктар закрытага ў 2020 годзе дызайн-агенцтва poligraf.by) — па арт. 361⁴ (садзейнічанне экстрэмісцкай дзейнасці) і 342 (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх) (прысуд невядомы).

Палітвязнямі прызнаныя таксама накіраваныя на прымусовае лячэнне ў псіхіятрычны стацыянар:

Аскер Алахвердзіеў — абвінавачваўся па арт. 361³;

Наталля Маныла — абвінавачвалася па арт. 361⁴.