Пуцін прыбудзе ў Мінск 6 снежня
26 лістапада, Позірк. Прэзідэнт Расіі Уладзімір Пуцін 6 снежня наведае Мінск для ўдзелу ў пасяджэнні Вышэйшага дзяржсавета Саюзнай дзяржавы (СД), паведамляе ТАСС.
Падрабязнасці візіту не прыводзяцца.
28 кастрычніка паведамлялася, што сустрэча Пуціна і Аляксандра Лукашэнкі ў рамках пасяджэння Вышэйшага дзяржсавета СД адбудзецца 5 снежня.
Раней МЗС Расіі заяўляў, што да пасяджэння ў Мінску плануецца завяршыць працу над дагаворам Беларусі і РФ аб гарантыях бяспекі, у якім пацвярджаецца гатоўнасць выкарыстоўваць у тым ліку ядзерную зброю ў адказ на “знешнюю агрэсію”.
Позна ўвечары 23 траўня пачаўся папярэдні візіт дэлегацыі Расіі на чале з Пуціным у Мінск. Перад гэтым Лукашэнка сустракаўся з Пуціным падчас свайго візіту ў Маскву 8–9 траўня на саміт ЕАЭС і парад да Дня Перамогі.
Пасля непрызнаных міжнароднай супольнасцю выбараў 2020 года дэмакратычныя сілы Беларусі неаднаразова звярталі ўвагу заходніх партнёраў і насельніцтва краіны на ўсё большую інтэграцыю Беларусі з Расіяй. Лукашэнка, які прадаставіў беларускую тэрыторыю для нападу расійскіх войскаў на Украіну і размяшчэння тактычнай ядзернай зброі РФ, абвінавачвалі ў гандлі суверэнітэтам Беларусі для захавання ўлады.
