У Лідскім раёне гарэў дызельны цягнік, пасажыры выбраліся самастойна

30 лістапада, Позірк. На чыгуначным участку паміж станцыямі Гуды і Бастуны каля вёскі Жырмуны (Лідскі раён Гродзенскай вобласці) загарэўся дызельны цягнік, вынікае з апублікаванага познім вечарам 30 лістапада паведамлення прэс-службы Міністэрства па надзвычайных сітуацыях.

Адзначаецца, што “адбылося загаранне галаўнога вагона дызель-цягніка двухвагоннай кампаноўкі “Ліда — Беняконі” УП “Баранавіцкае аддзяленне БЧ”.

15 пасажыраў самастойна пакінулі цягнік.

Праз паўгадзіны пасля публікацыі першага паведамлення МНС удакладніла, што пра здарэнне стала вядома ў 21:02. Ліквідаваць пажар накіраваліся чатыры разлікі. Ратавальнікі вызначылі, што ўзгаранне адбылося ў машынным аддзяленні.

“У 22:19 загаранне дызель-цягніка ліквідаванае работнікамі МНС. Пацярпелых няма. Прычына здарэння высвятляецца”, — адзначыла ведамства.