Латушка ў Гаазе: Ахвярай злачынства дэпартацыі стаў кожны трыццаты беларус
2 снежня, Позірк. “Створаная ў краіне атмасфера страху, тэрору і пераследаў прымусіла каля 300 тыс. беларусаў пакінуць радзіму. Кожны трыццаты жыхар пакінуў Беларусь. У іх проста не было іншага выбару. Усіх іх мы лічым ахвярамі злачынства дэпартацыі, злачынствы супраць чалавецтва”, — заявіў намеснік кіраўніка Аб’яднанага пераходнага кабінета (АПК), кіраўнік Народнага антыкрызіснага ўпраўлення (НАУ) Павел Латушка 2 снежня ў Гаазе на дыскусіі “Беларуская сітуацыя ў МУС: юрысдыкцыя МУС і неабходнасць падтрымкі дзяржаў-удзельніц”. Мерапрыемства арганізавана на палях 23-й сесіі Асамблеі Міжнароднага крымінальнага суда (МКС) у Гаазе (Нідэрланды).
Палітык заклікаў усе дзяржавы — удзельніцы МКС, “асабліва Польшчу і Латвію, якія далі бяспечны прытулак вялікаму ліку беларускіх уцекачоў”, далучыцца “да смелага звароту Літвы” ў МКС, “умацаваўшы гэтым намаганні дзеля забеспячэння адказнасці”беларускага рэжыму.
Сайд-івэнт, які праходзіць у Гаазе 2 снежня, арганізаваны праваабарончай арганізацыяй Redress, цэнтрам глабальнага правасуддзя і правоў чалавека M.A.R.A. пры ўдзеле НАУ. Ён прысвечаны звароту Літвы ў МКС з нагоды прыцягнення да адказнасці рэжыму Аляксандра Лукашэнкі.
Акрамя кіраўніка НАУ ў дыскусіі бяруць удзел прадстаўнікі Міністэрства юстыцыі Літвы, Міжнароднага камітэта па расследаванні катаванняў у Беларусі, а таксама “вядомыя міжнародныя эксперты ў сферы падобнага роду міжнародных злачынстваў, у тым ліку тыя, хто раней працаваў па падобнай сітуацыі ў М’янме і Бангладэш”.