ЗША маюць намер і надалей ціснуць на рэжым Лукашэнкі і падтрымліваць беларусаў — прадстаўнік Дзярждэпа

4 снежня, Позірк. Злучаныя Штаты Амерыкі маюць намер і надалей чыніць ціск на рэжым Аляксандра Лукашэнкі і падтрымліваць беларускі народ, вынікае з выступу намесніка каардынатара Офіса дапамогі ЗША Еўропе і Еўразіі ў структуры Дзяржаўнага дэпартамента Крыса Бёргаста 4 снежня ў Вільнюсе на другім стратэгічным дыялогу з беларускім дэмакратычным рухам.

Пасля падзей 2020 года, адзначыў прадстаўнік Дзярждэпа, ЗША занялі “прынцыповую пазіцыю па пытанні падтрымкі дэмакратычных памкненняў беларускага народа, грамадзянскай супольнасці і незалежных СМІ — як у выгнанні, так і ўнутры самой Беларусі”. Адным з “самых выразных і бачных сімвалаў гэтай пазіцыі” спікер назваў распачаты ў 2023 годзе стратдыялог, які дэманструе прыхільнасць ЗША да пераўтварэння Беларусі ў свабодную і дэмакратычную краіну.

Прымаючы да ўвагі характар мер уздзеяння рэжыму на прыхільнікаў перамен, ЗША настроены “падтрымліваць ціск” на ўлады ў Мінску, каб дамагчыся “спынення ўнутраных рэпрэсій”, “вызвалення ўсіх палітвязняў”, “правядзення свабодных і справядлівых выбараў пад міжнародным назіраннем” і “спынення саўдзелу рэжыму ў агрэсіўнай вайне Расіі супраць Украіны”.

Паводле слоў Бёргаста, ЗША “працягнуць падтрымліваць дэмакратычныя памкненні беларускага народа як праз узаемадзеянне са структурамі беларускага дэмакратычнага руху — офісам Ціханоўскай, Аб’яднаным пераходным кабінетам і Каардынацыйнай радай, так і праз узаемадзеянне і падтрымку грамадзянскай супольнасці”.

Стратэгічны дыялог — пляцоўка для падтрымкі сталых стасункаў беларускага дэмакратычнага руху з урадам Злучаных Штатаў Амерыкі. Першы раунд стратдыялогу адбыўся 6–8 снежня 2023 года ў Вашынгтоне.

4–5 красавіка ў сталіцы ЗША ўдзельнікі першых пасяджэнняў працоўных груп у рамках стратдыялогу абмеркавалі парушэнні правоў чалавека ў Беларусі, шляхі вызвалення палітвязняў, дзейнасць дэмакратычнага руху і грамадзянскай супольнасці.

Падрабязнасці даступныя падпісчыкам “Позірк+”