Праект бюджэту Саюзнай дзяржавы на 2025 год прыняты ў памеры 70,6 млн долараў

12 снежня, Позірк. Праект бюджэту Саюзнай дзяржавы Беларусі і Расіі (СД) на 2025 год зацверджаны ў памеры 7 млрд 328,2 млн расійскіх рублёў (каля 70,6 млн долараў па сённяшнім курсе Цэнтрабанка РФ).

Рашэнне аб гэтым прынята на 67-й сесіі Парламенцкага сходу СД 12 снежня ў Маскве, паведамляе прэс-служба Дзяржаўнай думы РФ.

Бюджэт-2025 на 5,1% большы за зацверджаны на гэты год (6 млрд 970,1 млн).

Плануецца, што даходная частка будзе сфарміраваная за кошт узносаў РФ і Беларусі — 7 млрд 107,3 млн расійскіх рублёў (6 млрд 161,95 млн; +15,3%): расійскі бок пералічыць 4 млрд 619,7 млн (4 млрд 5,27 млн; +15,3%), беларускі — 2 млрд 487,6 млн (2 млрд 156,68 млн; +15,3%), нявыкарыстаных сродкаў бюджэтаў СД мінулых гадоў — 220,9 млн расійскіх рублёў (808,15 млн; -71,7%), а таксама — даходаў, атрыманых тэлерадыёвяшчальнай арганізацыяй Саюзнай дзяржавы.

Выдаткі, згодна з праектам, складуць 6 млрд 943 млн расійскіх рублёў (5 млрд 722,2 млн; +21,3%).

Такім чынам, запланаваны прафіцыт у памеры 385,2 млн расійскіх рублёў (439,75 млн; -12,4%).

Праектам прадугледжана фінансаванне сямі праграм, 41 мерапрыемства і двух праектаў.

Цяпер бюджэт павінен быць ухвалены вышэйшым Дзяржаўным саветам СД.

2 красавіка 1996 года першы прэзідэнт РФ Барыс Ельцын і Аляксандр Лукашэнка падпісалі дагавор аб стварэнні супольнасці Беларусі і Расіі, а 2 красавіка 1997-га — дагавор аб саюзе Беларусі і Расіі. 23 траўня 1997 года быў прыняты статут саюза. 8 снежня 1999 года падпісаны дагавор аб стварэнні Саюзнай дзяржавы, які ўступіў у сілу 26 студзеня 2000 года.

Расія пачала фарсіраваць тэму інтэграцыі з Беларуссю ў снежні 2018 года. Дзмітрый Мядзведзеў, які займаў на той момант пасаду прэм’ер-міністра РФ, фактычна ўвязаў максімальнае збліжэнне дзвюх краін з далейшай падтрымкай Мінска з боку Масквы.

На пасяджэнні Вышэйшага дзяржсавета Саюзнай дзяржавы ў лістападзе 2021 года Лукашэнка і Пуцін падпісалі дэкрэт, якім зацвердзілі 28 саюзных праграм інтэграцыі. З тых часоў беларускія і расійскія чыноўнікі рэгулярна даюць справаздачу аб паспяховым выкананні гэтых дакументаў.