23 снежня, Позірк. Для беларусаў, што жывуць за мяжой, будуць даступныя шэсць участкаў для галасавання на прэзідэнцкіх выбарах 26 студзеня 2025 года. Усе яны адчыняцца на тэрыторыі Беларусі, адпаведнае рашэнне 23 снежня прыняла Цэнтральная выбарчая камісія.
Участкі размесцяцца ў Брэсце (№ 24; Брэсцкае абласное аб’яднанне прафсаюзаў), Віцебску (№ 15; Цэнтр культуры “Віцебск”), Гомелі (№ 74, Гомельскі абласны грамадска-культурны цэнтр), Гродна (№ 14; Гродзенскі дзяржаўны ўніверсітэт імя Янкі Купалы), Мінску (№ 61, гімназія № 75 імя Масленікава) і Магілёве (№ 84, сярэдняя школа № 24 імя Сіманава).
Паводле інфармацыі ЦВК, прагаласаваць змогуць грамадзяне, якія маюць выбарчае права, пастаянна пражываюць па-за межамі Беларусі, аформілі выезд для пастаяннага пражывання па-за краінай, стаяць на консульскім уліку і не маюць рэгістрацыі на беларускай тэрыторыі.
12 снежня стала вядома, што ў Беларусі створана 5.325 выбарчых участкаў для галасавання на прэзідэнцкіх выбарах.
Як і падчас рэспубліканскага рэферэндуму 2022 года, а таксама парламенцкіх і мясцовых выбараў 2024-га, усе ўчасткі знаходзяцца на тэрыторыі Беларусі. Такое новаўвядзенне ўзнікла пасля прэзідэнцкіх выбараў 2020 года, калі Аляксандр Лукашэнка прайграў Святлане Ціханоўскай на шэрагу выбарчых участкаў за мяжой.
23 снежня ЦВК зарэгістравала пяць кандыдатаў на пасаду прэзідэнта. Акрамя Лукашэнкі гэта лідары праўладных структур — Сяргей Сыранкоў (Кампартыя Беларусі), Аляксандр Хіжняк (Рэспубліканская партыя працы і справядлівасці), Алег Гайдукевіч (Ліберальна-дэмакратычная партыя), а таксама былы член Аб’яднанай грамадзянскай партыі, дэпутат Палаты прадстаўнікоў у 2016–2019 гадах, удзельніца выбарчай кампаніі 2020 года Ганна Канапацкая.
Прэзідэнцкая кампанія праходзіць пад поўным кантролем улад. Палітычнае поле краіны цалкам зачышчанае ад актыўных апанентаў Лукашэнкі. Прадстаўнікі беларускіх дэмакратычных сіл за мяжой называюць тое, што адбываецца, “спецаперацыяй па ўтрыманні ўлады”, праваабаронцы кажуць пра імітацыю канкурэнцыі.
З 1996 года ніводная выбарчая кампанія ў Беларусі не была прызнана незалежнымі назіральнікамі транспарэнтнай і адпаведнай дэмакратычным стандартам.
