23 снежня, Позірк. Напярэдадні святаў амбасада Германіі ў Мінску накіравала “беларусам, што несправядліва адбываюць тэрмін зняволення”, паштоўкі з віншаваннямі і запатрабавала вызвалення ўсіх палітзняволеных у Беларусі.
“Гэтыя людзі выказвалі сваё меркаванне ў вуснай ці пісьмовай форме, патрабавалі гарантаваных ім правоў і свабод, мірна пратэставалі ці актыўна ўдзельнічалі ў палітычным жыцці краіны, — адзначыла нямецкая дыпмісія на сваёй старонцы ў “Фэйсбуку”. — За гэта яны былі арыштаваныя і асуджаныя. Гэтым людзям не хапае родных і сяброў — асабліва ў святы, такія як Новы год і Каляды. Іх не хапае беларускаму грамадству і ў нашым жыцці, якое без іх збяднела. Іх не хапае”.
Паштоўкі, падкрэсліла амбасада, закліканыя ў тым ліку прадэманстраваць усяму свету і палітвязням, што “яны не забытыя”.
Паводле даных праваабарончага цэнтру “Вясна”, палітычным зняволеным у Беларусі дастаўляюць карэспандэнцыю выбарча, у асноўным толькі ад бліжэйшых сваякоў.
На 23 снежня ў Беларусі 1.297 чалавек прызнаныя палітвязнямі, рэальная колькасць тых, хто адбывае пакаранне з палітычных матываў, значна большая.
