14 студзеня, Позірк. У Брэсцкай, Віцебскай і Гродзенскай абласцях зноў будуць спаганяць мясцовы збор за перасячэнне мяжы Беларусі транспартам у пунктах пропуску, якія дзейнічаюць у гэтых рэгіёнах.
Брэсцкі і Гродзенскі абласныя саветы дэпутатаў прынялі такое рашэнне 26 снежня 2024 года (№ 62 і № 67, апублікаваныя 11 і 14 студзеня 2025 года адпаведна), Віцебскі — 30 снежня (№ 69, 11 студзеня). Рашэнні набудуць моц 1 лютага.
Усе гэтыя вобласці мяжуюць з краінамі Еўрасаюза: Брэсцкая — з Польшчай, Гродзенская — з Польшчай і Літвой, Віцебская — з Літвой і Латвіяй.
Транспартны збор у гэтых рэгіёнах спаганяўся з 1 лютага 2023 года па 1 студзеня 2025-га.
Ад выплаты збору вызваляюцца транспартныя сродкі, на якіх накіроўваюцца прадстаўнікі дзяржорганаў Беларусі “ў мэтах выканання службовых абавязкаў”; грамадзяне, якія выязджаюць з краіны для атрымання медыцынскай дапамогі, а таксама асобы, якія іх суправаджаюць, — “пры наяўнасці рашэння адпаведнай камісіі пры Міністэрстве аховы здароўя”; асобы, якія суправаджаюць малалетніх дзяцей “на лячэнне ў санаторна-курортныя арганізацыі”.
Не спаганяюць збор таксама з замежных грамадзян, якія прыбылі ў Беларусь на запрашэнне дзяржорганаў для ўдзелу ў мерапрыемствах; асобы, якія выязджаюць з краіны з пахавання членаў сям’і або блізкіх сваякоў; якія выязджаюць на падставе пастаноў аб дэпартацыі (высылцы); замежныя грамадзяне і асобы без грамадзянства пры наяўнасці дакументаў, якія пацвярджаюць “ступень цяжкасці і бачнасці цяжкасцей фізічнай актыўнасці і ўдзелу 75–100%”, што выдадзеныя “кампетэнтнымі органамі дзяржавы грамадзянскай прыналежнасці або звычайнага месца жыхарства”.
Для вызвалення ад выплаты збору абавязковая наяўнасць пацвярджальных дакументаў.
Плата спаганяецца за “выезд механічнага транспартнага сродку, які мае не менш як чатыры колы, тэхнічна дапушчальная максімальная маса якога не перавышае 5 тон, за выключэннем колавых трактароў і самаходных машын”.
Сума збору — 1 базавая велічыня (з 1 студзеня 2025 года складае 42 рублі). Не залежыць ад колькасці пасажыраў у транспарце.
Дакумент, які пацвярджае выплату збору, — у папяровым або электронным выглядзе — прадастаўляецца ў пунктах пропуску супрацоўніку органаў пагранічнай службы. Калі пагранічны кантроль ажыццяўляецца мытнымі органамі, то дакумент аб аплаце прадастаўляецца службовай асобе мытні.
Пасля закрыцця сумежнымі краінамі ЕС шэрагу пунктаў пропуску на мяжы з Беларуссю на тэрыторыі Брэсцкай вобласці дзейнічаюць пагранпераходы Брэст і Дамачова (мяжа з Польшчай), Віцебскай — Грыгароўшчына (мяжа з Латвіяй), Гродзенскай — Каменны Лог і Беняконі (мяжа з Літвой).
