Мінск 06:00

Ціханоўская ў Давосе падкрэсліла важнасць вяртання Беларусі статусу ІТ-краіны пасля дэмакратычных перамен

Фота: прэс-служба Святланы Ціханоўскай

21 студзеня, Позірк. Пасля дэмакратычных перамен, калі надыдзе час “аднаўляцца ад дыктатуры і рухацца да эканамічнага адраджэння”, для Беларусі важна вярнуць статус ІТ-краіны, заявіла Святлана Ціханоўская падчас дыскусіі “Будучыня Беларусі” ў межах Сусветнага эканамічнага форуму ў Давосе (Швейцарыя).

Беларусь, паводле яе слоў, раней была вядомая “выдатнымі стартапамі і ініцыятывамі”, нацыянальны ІТ-рынак трэба “зрабіць канкурэнтаздольным, прывабным, адкрытым для інвестараў з усяго свету”.

Сярод неабходных крокаў у гэтым кірунку Ціханоўская назвала “стварэнне ўмоў для вяртання на радзіму” спецыялістаў, а таксама стварэнне “атмасферы, якая дазволіць прадпрыемствам, таленавітым прадпрымальнікам і экспертам <…> прынесці з сабой фінансавы капітал, веды, досвед і кантакты”.

Ціханоўская таксама адзначыла важнасць інвестыцый у новыя тэхналогіі. Пасля дэмакратычных перамен, дадала яна, Беларусі неабходна “пачаць працэс еўраінтэграцыі і далучыцца да Савета Еўропы”, каб “вучыцца ў тых, хто ўжо прайшоў пераходны перыяд, скарыстацца іх лепшымі практыкамі і не паўтараць памылак”.

“Вокны магчымасцяў могуць адкрыцца ў любы момант, і мы павінны быць да гэтага гатовыя. Таму сёння ў Давосе мы наладжваем сувязі з урадамі, парламентамі, глабальнымі карпарацыямі. Гэта дапаможа зрабіць пераход больш хуткім і плаўным. Вельмі важна, асабліва на пачатковым этапе, правесці ўсе неабходныя рэформы, падтрымаць прыватную ініцыятыву і прыцягнуць інвестыцыі ў Беларусь”, — адзначыла палітык.

Візіт Ціханоўскай у Давос праходзіць 21–23 студзеня.

Падзяліцца: