Лукашэнка мае намер абмеркаваць з Пуціным будаўніцтва другой АЭС у Беларусі

21 студзеня, Позірк. “У бліжэйшы час абмяркуем з прэзідэнтам Расіі [Уладзімірам Пуціным] пытанне будаўніцтва другой атамнай станцыі на тэрыторыі Беларусі”, — заявіў Аляксандр Лукашэнка 21 студзеня падчас наведвання Мінскага аўтамабільнага завода (на падставе паведамлення неафіцыйнага тэлеграм-канала яго прэс-службы).

Цягам апошніх гадоў Лукашэнка неаднаразова заяўляў пра магчымасць будаўніцтва другой атамнай станцыі. Ён даручаў чыноўнікам ацаніць мэтазгоднасць павелічэння колькасці энергаблокаў дзейнай Беларускай АЭС або збудавання яшчэ аднаго ядзернага энергетычнага аб’екта.

30 красавіка 2024 года падчас наведвання Касцюковіцкага раёна (Магілёўская вобласць) Лукашэнка прызнаўся, што яго “паступова апаноўвае думка пра магчымасць будаўніцтва яшчэ адной станцыі” ў Беларусі, “але над гэтым пытаннем яшчэ думаюць, рашэнне пакуль не прынятае”.

“Другая пляцоўка (раней як альтэрнатыва Астравецкай, дзе пабудавана БелАЭС, была вызначана Краснапалянская пляцоўка) знаходзіцца на ўсход ад Магілёва. Я сёння думаю: калі будзем будаваць другую АЭС, мы дзе гэтыя рэактары размесцім?” — падзяліўся ён роздумамі.

Збудаванне БелАЭС пад Астраўцом (Гродзенская вобласць) завяршылася ўвосень 2023 года. Першы энергаблок сілкуе энергасістэму краіны з 3 лістапада 2020 года, другі — з 13 траўня 2023-га. У прамысловую эксплуатацыю яны ўведзеныя ў чэрвені 2021-га і лістападзе 2023-га адпаведна.

Аб’ект пабудаваны паводле праекта дзяржкарпарацыі “Расатам” і пераважна за кошт расійскага крэдыту. Раней заяўлялася, што на станцыю выдаткавана 5,36 млрд долараў. Летась 1 красавіка Мінск павінен быў пачаць пагашаць гэты крэдыт, але невядома, ці гэта было зроблена.

(будзе дапоўнена)