Ціханоўская і кіраўнік МЗС Чылі абмеркавалі магчымасць правядзення сумеснай канферэнцыі

24 студзеня, Позірк. Аб арганізацыі на базе Чылійскага ўніверсітэта сумеснай канферэнцыі па пераходнай справядлівасці і нацыянальным прымірэнні дамовіліся беларускі дэмакратычны лідар Святлана Ціханоўская і міністр замежных спраў Чылі Альберта ван Клаверэн на Сусветным эканамічным форуме ў Давосе, паведаміла прэс-служба дэмлідара.

Мэта мерапрыемства — абмен досведам дэмакратычнага транзіту ў Чылі і іншых краінах Паўднёвай Амерыкі і Еўропы. Ціханоўская прапанавала назваць канферэнцыю імем шматгадовага рэктара (1867-1883) Чылійскага ўніверсітэта, ураджэнца Беларусі Ігната Дамейкі, які, паводле яе слоў, аб’ядноўвае беларусаў і чылійцаў.

Адзначаецца, што дэмлідар падзякавала міністру за падтрымку Чылі дэмакратычнай Беларусі ў Савеце ААН па правах чалавека. Таксама бакі абмеркавалі ўзаемадзеянне ў рамках Супольнасці дэмакратый (Community of Democracies), з якім Аб’яднаны пераходны кабінет (АПК) нядаўна падпісаў мемарандум аб супрацоўніцтве. У тым ліку, адзначае прэс-служба дэмлідара, разглядалася супрацоўніцтва ў барацьбе з транснацыянальнымі рэпрэсіямі.

Ціханоўская і чылійскі міністр “закранулі пытанні прыцягнення рэжыму Лукашэнкі да адказнасці праз Міжнародны крымінальны суд і ўстанаўлення кантактаў беларускіх дэмсілаў з іншымі краінамі Паўднёвай Амерыкі“.

Як паведамляе прэс-служба дэмлідара, міністр замежных спраў Чылі адзначыў, што гандаль з Беларуссю мінімальны, а актыўныя палітычныя кантакты з Мінскам фактычна адсутнічаюць.

Даведка “Позірку”. Апошнім амбасадарам Беларусі, які ўручаў даверчыя граматы прэзідэнту Чылі ў якасці амбасадара па сумяшчальніцтве, у 2019 годзе быў кіраўнік дыпмісіі ў Аргенціне Уладзімір Астапенка, цяпер прадстаўнік АПК па міжнародным і еўрапейскім супрацоўніцтве.