Кіраўнік МЗС Эстоніі: Мы не прызнаем Лукашэнку легітымным лідарам Беларусі
Кіраўнік МЗС Эстоніі Маргус Цахкна
27 студзеня, Позірк. “Ніхто не быў здзіўлены”, — такім чынам вынікі мерапрыемства, якое афіцыйны Мінск называе “прэзідэнцкімі выбарамі”, пракаментаваў міністр замежных спраў Эстоніі Маргус Цахкна 27 студзеня перад пасяджэннем савета кіраўнікоў МЗС краін Еўрасаюза.
“Мы ўжо казалі (не ведаю, колькі разоў) пра гэтыя “нявыбары” ў Беларусі, на якіх толькі што быў прызначаны дыктатар [Аляксандр] Лукашэнка. Гэта не дэмакратычнае развіццё. Гэта дыктатура, і мы не прызнаем Лукашэнку легітымным лідарам Беларусі”, — падкрэсліў Цахкна.
25 студзеня кіраўнік эстонскай дыпламатыі назваў выбары-2025 у Беларусі “сімуляваннем дэмакратыі”, спробай рэжыму Лукашэнкі “узаконіць сваё кіраванне, арганізуючы фарс”. “Эстонія працягвае падтрымліваць імкненне беларускага народа да свабоднай і дэмакратычнай будучыні”, — адзначыў ён.
24 студзеня камітэт па замежных справах парламента Эстоніі (Рыйгікогу) выступіў з заявай пра тое, што “не прызнае так званыя прэзідэнцкія выбары, якія пройдуць у нядзелю ў Беларусі пад жорсткім кантролем рэжыму Лукашэнкі”.
“Аляксандр Лукашэнка, які кіруе Беларуссю пры падтрымцы расійскага рэжыму на працягу апошніх 30 гадоў, арганізуе 26 студзеня чарговы выбарчы фарс у спробе падфарбаваць свой дыктатарскі рэжым фальшывай маскай дэмакратыі, душачы пры гэтым правы чалавека і грамадзяніна”, — падкрэсліў камітэт Рыйгікогу.
Эстонскія парламентарыі заклікалі “арганізаваць свабодныя і дэмакратычныя прэзідэнцкія выбары ў Беларусі пры першай жа магчымасці пад назіраннем Арганізацыі па бяспецы і супрацоўніцтве ў Еўропе (АБСЕ) і іншых міжнародных арганізацый”.
Профільны камітэт Рыйгікогу таксама заклікаў міжнародную супольнасць “учыніць ціск на беларускі рэжым з мэтай спынення рэпрэсій і вызвалення людзей, якія апынуліся ў няволі за выказванне сваіх поглядаў”.
“Камітэт па міжнародных справах падтрымлівае заявы Еўрапарламента, АБСЕ, шэрагу нацыянальных парламентаў і ўрадаў краін — членаў Еўрасаюза, якія асуджаюць арганізацыю фіктыўных выбараў у атмасферы рэпрэсій і запалохвання і ў парушэнне ўсіх міжнародных прававых норм”, — гаворыцца ў заяве.
Парламенцкая структура таксама выказала падтрымку беларускаму народу “ў яго барацьбе за свабодную, дэмакратычную і годную будучыню” і заклікала працягнуць “актыўную міжнародную супрацу на ўсіх узроўнях для падтрымкі дэмакратыі, грамадзянскай супольнасці і свабоднай прэсы ў Беларусі”.
На так званых “прэзідэнцкіх выбарах” Лукашэнка, паводле папярэдніх даных ЦВК, атрымаў 86,82%, Сяргей Сыранкоў (Камуністычная партыя Беларусі) — 3,21%, Алег Гайдукевіч (Ліберальна-дэмакратычная партыя Беларусі) — 2,02%, Ганна Канапацкая (былы член Аб’яднанай грамадзянскай партыі, дэпутат Палаты прадстаўнікоў у 2016–2019 гадах, удзельніца выбарчай кампаніі 2020 года) — 1,86%, Аляксандр Хіжняк (Рэспубліканская партыя працы і справядлівасці) — 1,74%. Супраць усіх — 3,60%.