Праекты “Лукашолки” і “Простымі Словамі” прызнаныя “экстрэмісцкімі фарміраваннямі”

28 студзеня, Позірк. Міністэрства ўнутраных спраў 28 студзеня прызнала “экстрэмісцкімі фармаваннямі” праекты “Лукашолки” і “Простымі Словамі”. Гэта вынікае з абноўленага пераліку, апублікаванага на сайце ведамства.

Адзначаецца, што да першага (гумарыстычны праект) маюць дачыненне Ганна Федаронак і Ганна Канавалава. У тэлеграм-канале гэтага праекта 106 падпісчыкаў, а на “Ютубе” — 4.860.

Тымі, хто мае дачыненне да другога “фарміравання” названыя Кірыл Данько і Ганна Грабенчыкава. Акаўнты праекта ў сацсетках не абнаўляліся два гады.

На сёння ў Беларусі налічваецца 260 “экстрэмісцкіх фарміраванняў”, з якіх 89 атрымалі гэты статус у 2024 годзе.

Паводле звестак праваабарончага цэнтра “Вясна”, у 2024 годзе ў пералік дададзена 10 СМІ, кааліцыі, якія ўдзельнічалі ў выбарах у Каардынацыйную раду, тэатральная трупа “Вольныя Купалаўцы”, шэраг грамадскіх арганізацый і ініцыятыў, замежныя фонды ды інш.

Паводле праваабаронцаў, за першыя два месяцы 2021 года статус “экстрэмісцкага фармавання” атрымалі 27 груп, у 2022-м — 80, у 2023-м — 62, у 2024-м — 89.

56 рашэнняў у мінулым годзе было прынята Камітэтам дзяржаўнай бяспекі, 33 — Міністэрствам унутраных спраў.