Пастаянны прадстаўнік Беларусі: Выхад ЗША са структур ААН негатыўна паўплывае на арганізацыю, бо грошы вырашаюць многае
11 лютага, Позірк. Выхад ЗША з некаторых структур Арганізацыі Аб’яднаных Нацый, а таксама скарачэнне фінансавання асобных праграм паўплываюць на далейшую дзейнасць арганізацыі, заявіў дзяржСМІ пастаянны прадстаўнік Беларусі пры ААН Валянцін Рыбакоў.
“Паколькі гэтыя рашэнні былі прыняты адносна нядаўна, я пакуль не гатовы ацаніць нейкую прамы ўрон. Усё ж такі рашэнні, пра якія было абвешчана, канечне ж, адаб’юцца на дзейнасці арганізацыі. Абавязкова. Таму што ўсё ж грошы вырашаюць не ўсё, але вельмі многае”, — сказаў Рыбакоў.
Раней 11 лютага прэс-служба Аляксандра Лукашэнкі паведаміла пра яго сустрэчу з Рыбаковым.
На сустрэчы, як заяўлялася, Лукашэнка “пацікавіўся ў беларускага дыпламата, як развіваецца сітуацыя ў ЗША пасля выбараў і ў чым асаблівасць дзейнасці цяперашняга прэзідэнта Дональда Трампа”.
“Трэба аддаць належнае, Дональд салідна страсянуў некаторыя міжнародныя структуры. Як гэта адгукнулася ў Арганізацыі Аб’яднаных Нацый? І іншыя пытанні, якія тычацца Беларусі ў сувязі з гэтым”, — сказаў Лукашэнка.
5 лютага Трамп (як і падчас свайго першага прэзідэнцкага тэрміну ў чэрвені 2018-га) падпісаў указ аб выхадзе ЗША з Савета ААН па правах чалавека (СПЧ). Пры гэтым з 1 студзеня 2025 года ЗША не ўваходзілі ў гэты орган, членства ў якім ажыццяўляецца на ратацыйнай аснове, а мелі ў ім, як і некаторыя іншыя дзяржавы, статус назіральніка.
У рамках СПЧ пастаянна разглядаецца і традыцыйна крытыкуецца сітуацыя з правамі чалавека ў Беларусі, дзейнічае мандат спецдакладчыка, якім з 1 лістапада 2024 года з’яўляецца Нілс Муйжніекс.
Таксама Трамп увёў санкцыі супраць Міжнароднага крымінальнага суда (МКС), абвінаваціўшы яго ў незаконным пераследзе ЗША і бліжэйшых саюзнікаў, галоўным чынам Ізраіля, і абвясціў аб спыненні фінансавання Блізкаўсходняга агенцтва ААН для дапамогі палесцінскім бежанцам і арганізацыі работ.
Замарожаная дзейнасць Агенцтва ЗША па міжнародным развіцці (USAID), якое сярод іншага рэалізуе праграмы падтрымкі журналістаў у выгнанні. Гэтае рашэнне Трампа ўзрадавала беларускую дзяржпрапаганду, бо шэраг недзяржаўных СМІ з-за гэтага сутыкнуўся з фінансавымі праблемамі. Улады ў Мінску з 2020 года вядуць мэтанакіраваную працу па знішчэнні незалежных медыя.
30 верасня 2024 года ўрад Літвы перадаў у офіс пракурора МКС матэрыялы аб “трансгранічных злачынствах супраць чалавечнасці, учыненых Лукашэнкам і яго памагатымі ў дачыненні да беларусаў”. 24 студзеня гэтага года з аналагічнай заявай аб падачы на Лукашэнку пазову ў МКС па абвінавачванні ў злачынствах супраць чалавечнасці выступіла арганізацыя “Рэпарцёры без межаў”.
Лукашэнка назваў "дурнямі" Трампа і Харыс — кандыдатаў на прэзідэнцкіх выбарах у ЗША
24 кастрычніка, Позірк. Прэзідэнцкія выбары ў ЗША — "жудасныя, дурныя", а кандыдаты Камала Харыс і Дональд Трамп — "дурні", заявіў Аляксандр Лукашэнка 23 кастрычніка ў інтэрв'ю тэлеканалу "Расія 1". Відэафрагмент размовы з прапагандысткай Вольгай Скабеевай апублікаваны на неафіцыйным тэлеграм-канале прэс-службы …