Складскія запасы прампрадукцыі за дзевяць гадоў выраслі ў 2,7 раза
18 лютага, Позірк. Запасы гатовай прамысловай прадукцыі на складах па выніках студзеня 2025 года склалі 9 млрд 716 млн 835 тыс. рублёў, сведчаць даныя Нацыянальнага статыстычнага камітэта.
Паводле праведзенага “Позіркам” аналізу, са студзеня 2016 года яны павялічыліся ў 2,7 раза (з 3 млрд 570 млн 205 тыс.).
Найгоршая дынаміка зафіксаваная ў Брэсцкай вобласці, дзе затаваранасць стала большай у 3,4 раза (з 382 млн 911 тыс. да 1 млрд 293 млн 701 тыс. рублёў).
Далей ідуць: Віцебская і Гродзенская вобласці — у 3 разы (з 323 млн 310 тыс. да 968 млн 21 тыс. і з 406 млн 662 тыс. да 1 млрд 223 млн 1 тыс. адпаведна), Мінская — у 2,8 раза (з 900 млн 927 тыс. да 2 млрд 547 млн 382 тыс.), Гомельская — у 2,6 раза (з 405 млн 939 тыс. да 1 млрд 66 млн 833 тыс.), Мінск — у 2,4 раза (з 794 млн 431 тыс. да 1 млрд 926 млн 919 тыс.), Магілёўская — у 1,9 раза (з 356 млн 26 тыс. да 690 млн 978 тыс.).
Паводле звестак Белстата, аб’ём запасаў за студзень склаў 72,5% сярэднямесячнага аб’ёму вытворчасці.
Прамысловая вытворчасць у мінулым годзе ў бягучых цэнах склала 202,4 млрд рублёў — на 5,4% больш да 2023-га.
Па выніках студзеня — снежня 2024 года запасы складалі 8 млрд 689 млн 777 тыс. рублёў. Такім чынам за месяц яны павялічыліся на 11,8%.
9 красавіка 2024 года на нарадзе па развіцці прамысловасці Аляксандр Лукашэнка сярод іншых праблем галіны назваў рэалізацыю прадукцыі: “Склады трашчаць. Складскія запасы за 2023 год выраслі на 23%. Профільны віцэ-прэм’ер мяне закалыхвае: гэта нармальна, заўсёды так было — мы тут цяпер усё гэта прададзім. Але мы ж перыяд да перыяду ацэньваем гэтыя запасы. А колькі тэхнікі знаходзіцца на пляцоўках у дылераў, якія для многіх сталі дадатковым складам за мяжой?” Як заявіў прамоўца, на складах гандлёвых дамоў Мінскага трактарнага завода амаль 6,5 тыс. адзінак тэхнікі, або больш чым двухмесячны аб’ём вытворчасці.
25 верасня першы намеснік міністра прамысловасці Аляксандр Агароднікаў заявіў, што не лічыць гэтае пытанне хворым: “Наяўнасць складскіх рэшткаў — вытворчая неабходнасць. Калі мы выпускаем несерыйная прадукцыю, то яна на складзе не знаходзіцца, а адразу сыходзіць да пакупніка. Але ў большасці выпадкаў мы працуем з карпаратыўнымі кліентамі, пад якіх фарміруем заказ”.
Чыноўнік адзначыў, што гэтая партыя можа складаць і 100 тыс. асобнікаў той ці іншай прадукцыі: “Натуральна, што за адзін раз немагчыма забяспечыць такі аб’ём вытворчасці, таму і атрымліваецца некаторае назапашванне прадукцыі на складах”.