Уплыў расійскай культуры на жыхароў беларускіх гарадоў другасны ў параўнанні з заходняй — сацыёлаг
19 лютага, Позірк. Уплыў расійскай культуры на жыхароў беларускіх гарадоў другасны ў параўнанні з заходняй, і гэта з’яўляецца нечаканасцю, заявіў незалежны сацыёлаг Філіп Біканаў, прадстаўляючы з калегам Канстанцінам Несцяровічам вынікі даследавання “Беларуская ідэнтычнасць у 2024 годзе“.
Заходнім фільмам і серыялам аддаюць перавагу 38% апытаных, расійскім — 21% (савецкім — 22%, украінскім — 6%, беларускім — 3%, турэцкім — 2%).
Заходнюю музыку любяць слухаць 22%, расійскую — 19% (беларускую — 26%, часоў БССР — 17%, савецкую без БССР — 11%).
Прыхільнікамі сучаснай заходняй літаратуры з’яўляюцца 13% рэспандэнтаў, сучаснай расійскай — 2% (заходняй класікі — 24%, рускай — 22%, беларускай — 14%, беларускай сучаснай літаратуры — 4%).
Невялікую перавагу перад заходнімі маюць п’есы і спектаклі расійскіх аўтараў — 16% супраць 10% прыхільнікаў з ліку рэспандэнтаў (16% таксама любяць глядзець пастаноўкі беларускіх аўтараў).
Найбольш значны расійскі культурны ўплыў адчуваецца ў катэгорыі блогаў і камедыйнага кантэнту.