Спынена фінансаванне інвестпраектаў у Беларусі міжнароднымі банкамі на 19 млн еўра — Інстытут эканомікі НАН

6 сакавіка, Позірк. За апошнія гады спынена фінансаванне інвестыцыйных праектаў у Беларусі міжнароднымі банкамі “на суму больш за 18,8 млн еўра”, гаворыцца ў артыкуле загадчыцы сектара інвестыцыйнай палітыкі Інстытута эканомікі НАН Марыі Саломкі ў лютаўскім нумары часопіса “Фінансы. Улік. Аўдыт“.

У матэрыяле, азагалоўленым “Перасохлая крыніца? Дынаміка прытоку замежных інвестыцый з недружалюбных краін“, сцвярджаецца, што „вонкавыя пагрозы эканамічнай бяспецы“ шмат у чым вызначаюцца „санкцыйнымі абмежаваннямі ў дачыненні да Беларусі“ з іх боку.

Аналізуючы замежныя паступленні ў інвестыцыях у асноўны капітал за 2016–2023 гады, аўтар адзначае “вельмі моцнае скарачэнне аб’ёмаў крэдытаў замежных банкаў і атрыманых па замежных крэдытных лініях [запазычанняў] <…> — у восем і 16 разоў адпаведна“.

Таксама канстатуецца “адчувальнае памяншэнне” замежных інвестыцый з “недружалюбных краін” — з 3,5 млрд даляраў у 2016 годзе да 2 млрд у 2023-м (амаль на 43%. — “Позірк”.): “Сярод апошніх асноўную долю займаюць сродкі ЕС”.

Супрацоўніцтва Групы Сусветнага банка з Беларуссю ў выглядзе прадастаўлення новых крэдытаў або інвестыцый было прыпынена ў другой палове 2020 года пасля фальсіфікацыі прэзідэнцкіх выбараў і распачатых рэпрэсій. Увесну 2022 года яна спыніла ўсе свае праграмы ў краіне.

У красавіку 2022 года ўрад пастановай зацвердзіў пералік “замежных дзяржаў, якія здзяйсняюць недружалюбныя дзеянні ў дачыненні да беларускіх юрыдычных і (або) фізічных асоб”. Да іх прылічаныя ўсе краіны Еўрасаюза, а таксама Новая Зеландыя, Албанія, Ісландыя, Паўночная Македонія, Вялікабрытанія, ЗША, Чарнагорыя, Швейцарыя.

У ліпені таго ж года Саўмін вызначыў спіс са 190 беларускіх юрыдычных асоб з уласнікамі з дзяржаў, якія “здзяйсняюць недружалюбныя дзеянні”, якім забаронена адчужаць свае долі (акцыі) у статутных фондах. Пасля яго некалькі разоў пераглядалі.

У верасні 2023 года падпісаны ўказ № 285, якім устаноўлены асаблівы парадак атрымання прыбытку і дывідэндаў асобамі з замежных дзяржаў, якія “здзяйсняюць недружалюбныя дзеянні” ў дачыненні да Беларусі. Зарэгістраваныя ў краіне юрыдычныя асобы для выплаты прыбытку і (або) дывідэндаў такім удзельнікам павінны адкрыць у айчынных банках спецыяльныя рахункі (рахункі рэзідэнтаў). Сродкі пералічваюцца з аднаго рахунку на іншы ў дзесяцідзённы тэрмін з дня звароту за іх выплатай.

Гэтыя сродкі могуць выкарыстоўвацца толькі на фінансаванне інвестпраектаў у Беларусі; пагашэнне запазычанасці па асобных крэдытах банкаў; размяшчэнне ў безадзыўныя банкаўскія ўклады на тэрмін не менш за год у банку, у якім адкрыты спецрахунак; іншыя мэты, “ўзгодненыя ўрадам з кіраўніком дзяржавы.

Падрабязнасці даступныя падпісчыкам “Позірк+”