Пуцін прыме Лукашэнку на наступным тыдні

9 сакавіка, Позірк. Прэзідэнт РФ Уладзімір Пуцін на наступным тыдні прыме з візітам Аляксандра Лукашэнку, паведаміў журналіст Павел Зарубін у эфіры тэлеканала “Расія 1”.

Дату сустрэчы ён не назваў.

На прэс-канферэнцыі ў Мінску 26 студзеня Лукашэнка, адказваючы на пытанне, куды ён зробіць свой першы афіцыйны візіт у выпадку перамогі на выбарах, заявіў, што нядаўна абмяркоўваў гэтую тэму з Пуціным: “Слухай, будзе дзіўным, калі я паеду куды-небудзь, калі не ў Маскву” — “Аляксандр Рыгоравіч, мы заўсёды вас чакаем”. Вось такая была размова. Натуральна, гэта будзе не проста дзіўна, гэта будзе незразумела для многіх. Таму я планую, што мы сустрэнемся з прэзідэнтам Расіі ў Маскве і, як належыць афіцыйным візітам, правядзем адпаведныя кантакты і перамовы”.

Папярэдні раз Лукашэнка і Пуцін сустракаліся 25–26 снежня ў Санкт-Пецярбургу падчас пасяджэння кіраўнікоў дзяржаў — членаў Еўразійскага эканамічнага саюза, а таксама нефармальнага саміту Садружнасці Незалежных Дзяржаў.