Лукашэнка змяніў парадак накіравання грамадзян на санаторна-курортнае лячэнне

11 сакавіка, Позірк. Указ, які змяняе парадак накіравання насельніцтва на санаторна-курортнае лячэнне і аздараўленне, падпісаў 11 сакавіка Аляксандр Лукашэнка, паведамляе яго прэс-служба.

“Пры выдачы пуцёўкі з выкарыстаннем бюджэтных сродкаў дзіцяці на сумеснае санаторна-курортнае лячэнне з кімсьці з бацькоў [указам] выключаюцца неадназначныя трактоўкі права яе паўторнага атрымання ў бягучым годзе ў некалькіх месцах (работы і жыхарства)”, — гаворыцца ў паведамленні.

Таксама дакументам “рэгулююцца пытанні саступкі (перадачы) атрыманай і аплачанай пуцёўкі іншай асобе”.

Тэкст указа на сайце Лукашэнкі не апублікаваны.

Раней паведамлялася, што за кошт сродкаў рэспубліканскага бюджэту і Фонду дзяржаўнага сацыяльнага страхавання ў 2024 годзе было аздароўлена і прайшло лячэнне больш як 807 тыс. жыхароў Беларусі.

Агулам у 2024 годзе 1,565 млн чалавек (1,483 млн у 2023 годзе; +5,53%) прайшлі санаторна-курортнае лячэнне. Выручка санаторна-курортных паслуг павялічылася больш чым на 24% у параўнанні з 2023-м, перавысіўшы 1 млрд 8 млн рублёў. Сярэднегадавая напаўняльнасць санаторыяў дасягнула 84,3%.