Беларусь будзе штогод вылоўліваць у акваторыі РФ больш за 60 тыс. т рыбы

18 сакавіка, Позірк. Беларусь на 10 гадоў атрымала квоту на штогадовы вылаў у эканамічнай зоне мораў Расіі 61 тыс. тон рыбы, вынікае са змененага пагаднення паміж урадамі Беларусі і РФ аб супрацы ў галіне рыбнай гаспадаркі, апублікаванага 18 сакавіка на Нацыянальным прававым інтэрнэт-партале.

Базавы дакумент быў заключаны 13 сакавіка 2002 года, пагадненне, якое ўносіць у яго праўкі, — 21 студзеня 2025-га.

Беларусі выдзяляецца квота на вылаў у Баранцавым моры — не менш за 9 тыс. тон траскі і пікшы, Балтыйскім моры — не менш за 100 т траскі, не менш за 100 т балтыйскага селядца (салакі) і не менш за 800 т шпроту (кількі); Берынгавым моры — не менш за 30 тыс. т мінтаю і не менш за 1 тыс. т селядца, Ахоцкім моры — не менш за 20 тыс. т мінтаю.

Расія ў адпаведнасці з пагадненнем выдае дазволы на вылаў рыбы для сумесных беларуска-расійскіх прадпрыемстваў і арганізацый. Мінск вызначае гэтыя сумесныя прадпрыемствы і арганізацыі і замацоўвае за імі на дзесяцігадовы тэрмін права асваення ўлову.

Пры гэтым улоў і вырабленая з яго рыбная прадукцыя павінны быць абавязкова дастаўленыя і выгружаныя на тэрыторыі РФ. Прадугледжана прыярытэтнае выкарыстанне расійскай берагавой і партовай інфраструктуры, у тым ліку для забеспячэння і тэхнічнага абслугоўвання судоў сумесных беларуска-расійскіх прадпрыемстваў і арганізацый.

Расія дае ў адпаведнасці са сваімі законамі і правіламі парты для базавання рыбапрамысловага флоту сумесных беларуска-расійскіх прадпрыемстваў і арганізацый і права карыстання гэтымі партамі на ўмовах роўнасці з судамі сваёй дзяржавы.

Паводле даных Мінсельгасхарча, у 2024 годзе ў Беларусі планавалі атрымаць каля 15 тыс. т уласнай рыбнай прадукцыі.

У 2023 годзе Беларусь імпартавала 185 тыс. т рыбы і морапрадуктаў, у асноўным з Расіі.