18 сакавіка, Позірк. Урад Латвіі 18 сакавіка прыняў рашэнне аб абмежаванні руху праз пункт пропуску Патэрніекі на мяжы з Беларуссю, паведамляе выданне lsm.lv.
З 19 сакавіка ў гэтым месцы забаронена перасякаць мяжу пешшу і на веласіпедах, аўтамабілістаў абмежаванні не закрануць.
Аналагічныя рашэнні прынятыя ў дачыненні да пунктаў пропуску Грэбнева і Церахава на мяжы з Расіяй.
Падкрэсліваецца, што абмежаванні ўведзены на нявызначаны тэрмін.
Меры прыняты для таго, каб “умацаваць сістэму аховы мяжы і зрабіць памежны кантроль больш эфектыўным”, гаворыцца ў публікацыі.
17 сакавіка стала вядома, што ў сувязі з усё большым прытокам мігрантаў Дзяржаўная памежная ахова (ДПА) Латвіі звярнулася да ўрада з просьбай часткова закрыць пункт пропуску Патэрніекі (з беларускага боку — Грыгароўшчына), дазволіўшы яго перасячэнне толькі для аўтатранспартных сродкаў.
Латвійскі бок 16 сакавіка з 14:00 да 22:40 па беларускім часе прыпыніў афармленне транспарту, які накіроўваўся праз адзіны адкрыты на беларуска-латвійскім напрамку пункт пропуску Грыгароўшчына, на ўездзе і выездзе былі ўстаноўленыя загараджальныя шчыты. Гэта было зроблена ў сувязі са спробамі нелегальных мігрантаў трапіць у Латвію праз гэты пункт пропуску.
Грыгароўшчына застаўся адзіным дзейным пунктам пропуску на мяжы дзвюх краін пасля таго, як 19 верасня 2023 года з прычыны росту патоку нелегальных мігрантаў з боку Беларусі Латвія на нявызначаны тэрмін закрыла і забарыкадавала пункт пропуску Сілене (Урбаны).
