Прадухілены вываз у Расію чарговай партыі каляровых металаў

16 лістапада, Позірк. Вываз у Расію каля 5 тон лому каляровых металаў прадухілены ў Аршанскім раёне, паведамляе УУС Віцебскай вобласці.

Адзначаецца, што груз без суправаджальных дакументаў быў знойдзены супрацоўнікамі Дзяржаўтаінспекцыі пры даглядзе аўтамабіля “Івека” на аўтадарозе М1 “Брэст — Мінск — мяжа Расійскай Федэрацыі”.

Аўтамабілем кіраваў 40-гадовы жыхар Чашнік (Віцебская вобласць).

“Кіроўца распавёў, што планаваў рэалізаваць груз у Расіі. Метал на суму больш за 19 тыс. рублёў канфіскаваны”, — гаворыцца ў паведамленні.

У дачыненні да мужчыны складзены адміністрацыйны пратакол за “парушэнне парадку вывазу з Рэспублікі Беларусь лому і адходаў чорных і каляровых металаў”. Яму пагражае буйны штраф і канфіскацыя тавару, адзначылі ва УУС.