Два 18-гадовыя хлопцы загінулі ў ДТЗ у Веткаўскім раёне, аўтамабіль разарвала на часткі

16 лістапада, Позірк. Аб смяротным дарожна-транспартным здарэнні ў Веткаўскім раёне (Гомельская вобласць) паведамляе Міністэрства ўнутраных спраў.

Аварыя адбылася 16 лістапада каля 2:30 у аграгарадку Няглюбка.

“18-гадовы бяспраўнік за рулём “Опель”, паводле папярэдняй інфармацыі, не справіўся з кіраваннем, выехаў на абочыну і здзейсніў наезд на дрэва. Ад удару аўтамабіль разарвала на часткі”, — гаворыцца ў паведамленні.

Адзначаецца, што ў выніку ДТЗ “кіроўца і яго 18-гадовы пасажыр загінулі”, “абодва не былі прышпіленыя рамянямі бяспекі”.

“Вядома, што напярэдадні маладыя людзі ўжывалі алкаголь”, —  паведамляе ведамства.

На месцы ДТЗ працуюць супрацоўнікі ДАІ і следча-аператыўная група.