Праз тыдзень пасля візіту ў Маскву Лукашэнка “каля гадзіны” гаварыў з Пуціным па тэлефоне

20 сакавіка, Позірк. Прэс-служба Аляксандра Лукашэнкі паведаміла 20 сакавіка пра яго тэлефонную размову з Уладзімірам Пуціным.

“Размова доўжылася каля гадзіны. Абмяркоўваліся ў ходзе размовы пытанні саюзнага будаўніцтва, у тым ліку ў развіццё афіцыйнага візіту Аляксандра Лукашэнкі ў Расію, які адбыўся нядаўна. У цэнтры ўвагі таксама была тэма еўразійскай інтэграцыі і праца ў рамках беларускага старшынства ў ЕАЭС сёлета”, — гаворыцца ў паведамленні.

Адзначаецца, што палітыкі абмеркавалі таксама “графік маючых адбыцца кантактаў і сумесных мерапрыемстваў”, у тым ліку “Міжнародны форум у Валгаградзе да 80-годдзя Вялікай Перамогі, які пройдзе ў канцы красавіка”.

“На канец чэрвеня гэтага года запланаваны саміт ЕАЭС, які пройдзе ў Мінску. Кіраўнікі дзяржаў асобна спыніліся на яго парадку дня”, — адзначае прэс-служба Лукашэнкі.

Заяўляецца, што Пуцін праінфармаваў “беларускага калегу” таксама аб “падрабязнасцях нядаўна праведзенай размовы з прэзідэнтам ЗША Дональдам Трампам, у тым ліку па ўкраінскай тэматыцы”.

13 сакавіка Лукашэнка наведваў Маскву, дзе правёў перамовы з Пуціным.