З пачатку года ад агню загінула 200 чалавек

23 сакавіка, Позірк. За мінулыя дзяжурныя суткі (з 6:00 22 сакавіка да 6:00 23 сакавіка) ад агню ў Беларусі сканалі чатыры чалавекі, вынікае з аператыўнай зводкі Міністэрства па надзвычайных сітуацыях.

У Навагрудскім раёне (Гродзенская вобласць) агонь забраў два жыцці, у Мінску і Барысаўскім раёне (Мінская вобласць) — па адным.

З пачатку года ў Беларусі адбылося 1.835 пажараў (за аналагічны перыяд 2024-га — 1.302; +40,9%), загінула 200 чалавек (148; +35,1%).

Варта адзначыць, што ў зводнай табліцы, якую МНС абнаўляе штодня, часам адбываецца карэкцыя звестак па смяротнасці на пажарах у бок заніжэння. “Позірк” ужо некалькі разоў звяртаў на гэта ўвагу.

У Беларусі фіксуецца “сур’ёзная праблематычная сітуацыя” з гібеллю людзей на пажарах, заявіў на прэс-канферэнцыі 4 сакавіка ў Мінску памочнік міністра па надзвычайных сітуацыях, прэс-сакратар МНС Яўген Бараноўскі.

“Вельмі сур’ёзны рост, такі непрыемны рост [колькасці загінулых]”, — сказаў ён.

Асноўная прычына, з якой павялічваецца колькасць пажараў, — неасцярожнае абыходжанне з агнём, у першую чаргу звязанае з курэннем у стане алкагольнага ап’янення, адзначыў прадстаўнік МНС.

“Сёння мы рэалізуем дастаткова дакладны, адрасны, на падставе сур’ёзнага аналізу комплекс прафілактычных мер, — паведаміў Бараноўскі. — І мы бачым партрэт групы рызыкі. Мы ўсе цудоўна ведаем, што пажары ў асноўным адбываюцца ў начны час сутак, ахвярамі агню становяцца людзі, якія вядуць асацыяльны лад жыцця. Гэта людзі сталага веку, якія жывуць самотна, пенсіянеры, інваліды”.

“Сёння на дзяржаўным узроўні, у рамках працы ўсіх зацікаўленых суб’ектаў прафілактыкі (не толькі МНС) <…> робіцца ўсё для таго, каб стабілізаваць гэтую абстаноўку, але разам з тым праблема існуе”, — заявіў ён.