Жанчына і яе чацвёра непаўналетніх дзяцей выратаваліся з палаючага дома ў Касцюковіцкім раёне

25 сакавіка, Позірк. Шматдзетная сям’я выратавалася на пажары ў вёсцы Бароўка Касцюковіцкага раёна (Магілёўская вобласць), паведамляе прэс-служба Міністэрства па надзвычайных сітуацыях.

Здарэнне адбылося днём 24 сакавіка, адзначае ведамства.

Паведамляецца, што “пажар пабачыў дзевяцігадовы сын гаспадыні”. “Полымя хутка распаўсюдзілася не толькі на гараж, але і закранула дах жылога дома. На шчасце, гаспадыня з чатырма дзецьмі, узростам ад аднаго да 17 гадоў, паспела выбрацца на вуліцу. Вогненная пагроза адрэзала ім шлях да выхаду, і яны былі вымушаны эвакуіравацца праз акно”, — адзначае МНС.

Паводле інфармацыі ведамства, у выніку пажару пацярпелі аўтамабіль жанчыны, дах, сцены і столь дома, а таксама “поўнасцю знішчаны дах гаража і драўляны хлеў”.

Паводле звестак МНС, за мінулыя дзяжурныя суткі (з 6:00 24 сакавіка да 6:00 25 сакавіка) на тэрыторыі краіны адбылося 24 пажары, з пачатку года — 1.885 (за аналагічны перыяд 2024-га — 1.335; +41,2%).

Агонь за суткі забраў жыцці двух чалавек: у Пухавіцкім раёне (Мінская вобласць) загінуў мужчына 1972 года нараджэння, у Шклове (Магілёўская вобласць) — “грамадзянін, які самавольна пракраўся ў склеп”.

Акрамя гэтага, 24 сакавіка ад апёкаў, атрыманых двума днямі раней на пажары ў Бярозе (Брэсцкая вобласць), у бальніцы памёр мужчына 1978 г.н.

Усяго з пачатку года ад уздзеяння агню загінула 204 чалавекі (150; +36%).

Варта адзначыць, што ў зводнай табліцы, якую МНС абнаўляе штодня, часам адбываецца карэкцыя звестак па смяротнасці на пажарах у бок заніжэння. “Позiрк” ужо некалькі разоў звяртаў на гэтую ўвагу.

У Беларусі фіксуецца “сур’ёзная праблематычная сітуацыя” з гібеллю людзей на пажарах, заявіў на прэс-канферэнцыі 4 сакавіка ў Мінску памочнік міністра па надзвычайных сітуацыях, прэс-сакратар МНС Яўген Бараноўскі.

“Вельмі сур’ёзны рост, такі непрыемны рост [колькасці загінуўшых]”, — сказаў ён.

Асноўная прычына, па якой павялічваецца колькасць пажараў, — неасцярожнае абыходжанне з агнём, у першую чаргу звязанае з курэннем у стане алкагольнага ап’янення, адзначыў прадстаўнік МНС.

“Сёння мы рэалізуем дастаткова дакладны, адрасны, на падставе сур’ёзнага аналізу комплекс прафілактычных мер, — паведаміў Бараноўскі. — І мы бачым партрэт групы рызыкі. Мы ўсе цудоўна ведаем, што пажары ў асноўным адбываюцца ў начны час сутак, ахвярамі агню становяцца людзі, якія вядуць асацыяльны лад жыцця. Гэта састарэлыя людзі, адзінокія пенсіянеры, інваліды”.

“Сёння на дзяржаўным узроўні, у рамках працы ўсіх зацікаўленых суб’ектаў прафілактыкі (не толькі МНС) <…> робіцца ўсё для таго, каб стабілізаваць гэтую абстаноўку, але разам з тым праблема існуе”, — заявіў ён.