Нацбанк Украіны з 31 сакавіка спыніць разлічваць курс грыўны да беларускага рубля

25 сакавіка, Позірк. Нацыянальны банк Украіны (НБУ) не будзе з 31 сакавіка разлічваць афіцыйны курс грыўны да шэрагу замежных валют, вынікае з пастановы рэгулятара № 36 ад 24 сакавіка.

У паведамленні НБУ гаворыцца, што разлік курсу не будзе ажыццяўляцца адносна беларускага і расійскага рублёў, бразільскага рэала, армянскага драма, дамініканскага песа, іракскага дынара, іранскага рыяла, лівійскага дынара, мараканскага дырхама, новага тайваньскага долара і пакістанскай рупіі.

“Патрэба ў абнаўленні падыходаў абумоўлена значным ростам узроўню аўтаматызацыі разлікаў, што знізіла аперацыйныя абмежаванні і рызыкі штодзённага разліку афіцыйнага курсу для шырокага пераліку валют”, — адзначае Нацбанк Украіны.

Раней ва Украіне выкарыстоўваліся два пералікі валют — курсы адной групы пералічваліся штодня, другой — штомесяц. Цяпер жа, як заяўляецца, гэтая практыка “страціла сваю актуальнасць”.

На 25 сакавіка, паводле даных НБУ, 1 беларускі рубель роўны 15,1552 грыўны.