У Сейме Літвы думаюць пра большую уніфікацыю санкцый, якія прымяняюцца да грамадзян РФ і Беларусі — Наўседа

26 сакавіка, Позірк. У Сейме Літвы існуюць розныя меркаванні і прапановы адносна санкцый у дачыненні да грамадзян Беларусі і РФ, у прыватнасці, аб іх большай уніфікацыі, заявіў прэзідэнт Літвы Гітанас Наўседа, якога цытуе Delfi.

“Мабыць, будзе больш дарэчы каментаваць тады, калі гэтыя рашэнні будуць прынятыя. Спадзяюся, [яны] у прынцыпе апраўдаюць тыя чаканні, што асаблівы падыход да такіх рэжымаў, якія дэстабілізуюць сітуацыю ў рэгіёне, павінен быць вельмі прынцыповым”, — адзначыў літоўскі прэзідэнт.

14 сакавіка паведамлялася, што старшыня кансерватыўнай партыі “Саюз Айчыны — Хрысціянскія дэмакраты Літвы” Лаўрынас Кашчунас прапануе ўзмацніць жорсткасць абмежаванняў для беларусаў, прапісаныя ў прадстаўленым літоўскім МЗС законапраекце аб прадаўжэнні нацыянальных санкцый.

Парламентарый разам з калегамі па апазіцыі мае намер зарэгістраваць адпаведны варыянт у Сейме.

Міністэрства ўнутраных спраў Літвы выказала занепакоенасць у сувязі з гэтай ініцыятывай.

13 сакавіка стала вядома, што МЗС Літвы прапануе Сейма падоўжыць на год нацыянальныя санкцыі ў дачыненні да грамадзян Беларусі і РФ — да 2 мая 2026-га.

У адпаведнасці з законам аб санкцыях, які парламент Літвы ўпершыню прыняў у 2023 годзе, прыпынены прыём заяў на атрыманне шэнгенскіх і нацыянальных віз ад грамадзян Беларусі і РФ за выключэннем выпадкаў, калі літоўскае МЗС выступае пасярэднікам у прыёме дазволаў на часовае пражыванне. Выключэнне робіцца толькі для тых, у каго ёсць дзеючая шэнгенская або нацыянальная віза, від на жыхарства ў Літве ці іншай краіне ЕС.

Беларусаў і расіян, якія прыбываюць з-за межаў ЕС, дадаткова правяраюць на наяўнасць пагроз нацыянальнай бяспецы, грамадскаму, дзяржаўнаму парадку, унутранай бяспецы.

Таксама яны не могуць увозіць або вывозіць украінскія грыўны; забаронены ўвоз у Літву сельскагаспадарчай прадукцыі і кармоў расійскага ці беларускага паходжання.