Польшча будзе кантраляваць мяжу з Беларуссю з дапамогай штучнага інтэлекту
30 сакавіка, Позірк. Улады Польшчы рэалізавалі чарговы комплекс мер па ўмацаванні мяжы з Беларуссю, паведамляе Міністэрства ўнутраных спраў і адміністрацыі гэтай краіны.
Узмацненне кантролю ажыццёўлена за кошт мадэрнізацыі пабудаванай уздоўж мяжы загароды, адзначае ведамства.
Паведамляецца, што канструкцыю абсталявалі “камерамі для назірання за знешнім бокам загароды, святлодыёднымі свяцільнямі для асвятлення тэхнічнай дарогі, дадатковымі пунктамі відэаназірання для аховы водапрапускных труб”.
Таксама гаворыцца пра “ўкараненне механізму з выкарыстаннем штучнага інтэлекту” з мэтай “класіфікацыі сігналаў трывогі ад оптавалакновых кабеляў выяўлення”.
Удакладняецца, што гэтыя новаўвядзенні рэалізаваныя на ўчастку мяжы ў Падляскім ваяводстве.
27 сакавіка паведамлялася, што ўрад Польшчы абмежаваў права мігрантаў прасіць аб прадастаўленні міжнароднай абароны на мяжы з Беларуссю. Пра гэта заявіў міністр унутраных спраў і адміністрацыі, каардынатар спецыяльных службаў Томаш Семоняк.
Напярэдадні прэзідэнт Польшчы Андрэй Дуда падпісаў закон, які дазваляе не прымаць заявы аб прадастаўленні міжнароднай абароны на асобных участках мяжы, якія вызначае ўрад. Парламент падтрымаў гэты дакумент у канцы лютага.
Семоняк напісаў на сваёй старонцы ў сацыяльнай сетцы Х, што адпаведная пастанова “дае супрацоўнікам Памежнай аховы адзін з ключавых інструментаў для барацьбы з нелегальнай міграцыяй, якая з’яўляецца элементам гібрыднай агрэсіі супраць Польшчы, а таксама для спынення міжнароднай злачыннасці”.
Польшча дасягнула “98% эфектыўнасці затрыманняў” нелегальных мігрантаў, якія імкнуцца перасекчы мяжу з беларускай тэрыторыі, заявіў прэм’ер-міністр Дональд Туск 22 сакавіка ў рамках сустрэчы з прадстаўнікамі сілавых структур у падраздзяленні Памежнай аховы ў горадзе Крынкі (мяжуе з Бераставіцкім раёнам Гродзенскай вобласці).
Паводле яго слоў, на мяжы з Беларуссю знаходзіцца 11 тыс. вайскоўцаў, пагранічнікаў і паліцэйскіх.
Міністр нацабороны і віцэ-прэм’ер Уладзіслаў Касіняк-Камыш паведаміў, што непасрэдна на мяжы знаходзіцца каля 5 тыс. салдат, у рэзерве — яшчэ 1 тыс. Усяго для аперацыі па ахове мяжы выдзелена 17 тыс. вайскоўцаў.
Польшча пабудавала загароду на мяжы з Беларуссю для процідзеяння нелегальнай міграцыі. Бар’ер пастаянна ўдасканальваецца, абсталёўваецца сучасным лічбавым абсталяваннем. Загароды на мяжы з Беларуссю таксама збудаваныя Літвой і Латвіяй.
Міграцыйны крызіс на мяжы Беларусі і краін Еўрасаюза працягваецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.
З пачатку 2025 года суседнія дзяржавы ЕС спынілі прынамсі 3,2 тыс. спробаў нелегальнага пранікнення з беларускай тэрыторыі, сведчыць праведзены “Позіркам” параўнальны аналіз аператыўных звестак іх памежных службаў на 27 сакавіка. Больш за ўсё зафіксавала Польшча — каля 2,7 тыс.
За 2024 год Літва, Латвія і Польшча прадухілілі 36,3 тыс. спробаў незаконнага пранікнення мігрантаў з беларускай тэрыторыі.
Аляксандр Лукашэнка неаднаразова заяўляў, што беларускія памежнікі не будуць спыняць нелегальных мігрантаў, якія ідуць у Еўрасаюз праз Беларусь, таму што іх туды “паклікалі”.
Умацаванне мяжы з Беларуссю абыйдзецца Польшчы ў 610 млн долараў
29 снежня, Позірк. Умацаванне мяжы з Беларуссю ў рамках процідзеяння нелегальнай міграцыі абыйдзецца Польшчы ў 2,5 млрд злотых (каля 610 млн долараў), паведаміў брытанскаму выданню Financial Times намеснік міністра ўнутраных спраў і адміністрацыі Мацей Душчык. У публікацыі гаворыцца, што Варшава …