Кіроўцу сталічнага аўтобуса выстаўленае абвінавачанне за леташнюю аварыю з 51 пацярпелым
31 сакавіка, Позірк. 56-гадоваму кіроўцу рэйсавага аўтобуса выстаўленыя абвінавачанні за леташняе дарожна-транспартнае здарэнне, у якім пацярпелі дзясяткі пасажыраў, вынікае з паведамлення прэс-службы Следчага камітэта.
Паводле інфармацыі следства, аварыя адбылася 16 красавіка 2024 года на 14-м кіламетры дарогі М-4 (летась ведамствы паведамлялі, што гэта здарылася на Смілавіцкім тракце, які з’яўляецца часткай М-4). Сцвярджаецца, што мужчына, “праявіўшы няўважлівасць да дарожнага становішча, з’ехаў <…> у паласу разгону, дзе сутыкнуўся з вялікагрузам Volvo”.
“У выніку ДТЗ пацярпеў 51 пасажыр аўтобуса, з якіх дзевяць атрымалі цяжкія цялесныя пашкоджанні. Цяпер іх жыццю нічога не пагражае”, — заяўляе СК.
Следства мяркуе, што кіроўца аўтобуса “парушыў шэраг пунктаў Правілаў дарожнага руху, у тым ліку кіраваў транспартным сродкам без акуляраў, пры наяўнасці адпаведнай адзнакі ў медыцынскай даведцы”.
У рамках расследавання праведзена больш за 150 экспертных даследаванняў, дапытана каля 60 чалавек.
Мужчыну інкрымінавалі ч. 2 арт. 317 Крымінальнага кодэкса (парушэнне правілаў дарожнага руху, асобай кіраўніком транспартным сродкам, якое пацягнула з неасцярожнасці прычыненне цяжкіх цялесных пашкоджанняў). Пакаранне паводле гэтага артыкула — да 5 гадоў пазбаўлення волі. Абвінавачаны віну не прызнаў.
Раней “Позірк” паведамляў, што агульная колькасць аўтамабільных аварый у Беларусі ў 2024 годзе павялічылася на 8,8% у параўнанні з 2023-м (з 3.173 да 3.453). Загінула ў гадавым вымярэнні на 0,5% менш чалавек (434 супраць 436). Сітуацыя ў рэгіёнах наступная:
- Брэсцкая вобласць: +13,2% аварый (507 супраць 448) і +16,9% загінулых (76 супраць 65);
- Віцебская вобласць: +4,7% аварый (405 супраць 387) і +32,7% загінулых (65 супраць 49);
- Гомельская вобласць: -1,9% аварый (424 супраць 432) і +3,1% загінулых (66 супраць 64);
- Гродзенская вобласць: +9% аварый (339 супраць 311) і +12,8% загінулых (44 супраць 39);
- Мінская вобласць: +5,4% аварый (685 супраць 650) і -22,8% загінулых (115 супраць 149);
- Магілёўская вобласць: +19,7% аварый (449 супраць 375) і +17,4% загінулых (54 супраць 46);
- Мінск: +13% аварый (644 супраць 570) і -41,7% загінулых (14 супраць 24).
Гл. таксама: