Масква і Мінск “паслядоўна адстойваюць свае законныя знешнепалітычныя інтарэсы”, сцвярджае Пуцін
Уладзімір Пуцін уручае Аляксандру Лукашэнку ордэн Андрэя Першазванага. Крэмль, 9 кастрычніка 2024 года
2 красавіка, Позірк. У “складанай міжнароднай абстаноўцы” сумесныя дзеянні Масквы і Мінска “забяспечваюць умацаванне абароннага патэнцыялу і надзейную бяспеку Саюзнай дзяржавы”, гаворыцца ў віншаванні прэзідэнта РФ Уладзіміра Пуціна з нагоды Дня яднання народаў Беларусі і Расіі (2 красавіка).
“Мы паслядоўна адстойваем свае законныя знешнепалітычныя інтарэсы і разам працуем з замежнымі партнёрамі ў мэтах фармавання больш справядлівага, шматпалярнага светапарадку”, — прыводзіць прэс-служба слова віншавальніка, што развязаў 24 лютага 2022 года поўнамаштабную вайну супраць Украіны, у якой яму садзейнічае рэжым Аляксандра Лукашэнкі.
Пуцін заявіў, што за перыяд “саюзнага будаўніцтва” ў бакоў атрымалася “немала зрабіць” для развіцця двухбаковых сувязей і прасоўвання “ўзаемавыгадных інтэграцыйных працэсаў”.
“Вынікі гэтых намаганняў адчуваюцца без перабольшання ва ўсіх сферах нашага жыцця, — лічыць кіраўнік РФ. — Грамадзяне Расіі і Беларусі карыстаюцца роўнымі правамі ў сферах медыцыны і адукацыі, сацыяльнага і пенсіённага забеспячэння, а таксама ў выбары месца жыхарства і працы”.
Палітык таксама звярнуў увагу на пашырэнне “прадуктыўнай гандлёва-эканамічнай, навукова-тэхнічнай і гуманітарнай супрацы”, а таксама “кантактаў па лініі парламентаў, рэгіёнаў і гарадоў”.
2 красавіка 1996 года першы прэзідэнт РФ Барыс Ельцын і Аляксандр Лукашэнка падпісалі дагавор аб стварэнні супольнасці Беларусі і Расіі, а 2 красавіка 1997-га — дагавор аб Саюзе Беларусі і Расіі. 23 траўня 1997 года быў прыняты статут саюза. 8 снежня 1999 года падпісаны дагавор аб стварэнні Саюзнай дзяржавы, які набыў моц 26 студзеня 2000 года.
Расія пачала фарсіраваць тэму інтэграцыі з Беларуссю ў снежні 2018 года. Дзмітрый Мядзведзеў, які на той момант займаў пасаду прэм’ер-міністра РФ, фактычна ўвязаў максімальнае збліжэнне дзвюх краін з далейшай падтрымкай Мінска з боку Масквы.
Працэс актывізаваўся пасля таго, як Расія падтрымала Лукашэнку на хвалі поствыбарных пратэстаў 2020 года, а таксама пасля пачатку поўнамаштабнай вайны РФ супраць Украіны ў лютым 2022-га, у якой афіцыйны Мінск падтрымлівае Крэмль.
На пасяджэнні Вышэйшага дзяржсавета Саюзнай дзяржавы ў лістападзе 2021 года Лукашэнка і Пуцін падпісалі дэкрэт, якім зацвердзілі 28 саюзных праграм інтэграцыі. На сумеснай прэс-канферэнцыі 13 сакавіка 2025-га ў Маскве расійскі лідар паведаміў, што “ўсе 28 праграм, якія былі намечаныя, выкананыя на 100%”.
Падчас выступу 14 сакавіка Лукашэнка ў Савеце Федэрацыі РФ Лукашэнка выказаўся супраць найхутчэйшага зліцця дзвюх краін: “Калі Расія ўвойдзе ў склад Беларусі ці, наадварот, Беларусь увойдзе ў склад Расіі? Рабяты, гэта наўрад ці будзе ў бліжэйшы час. Калі мы будзем у гэтым плане біцца ў гэтыя адчыненыя дзверы, мы загубім усё, што мы зрабілі. Трэба ісці спакойна, step by step, крок за крокам, нешта рэалізоўваючы, як мы”.
Паводле слоў спікера, у цяперашняй сітуацыі “з устаноўкамі, як у Савецкім Саюзе, падыходзіць нельга”, гэты “момант упушчаны”. Разам з тым, адзначыў Лукашэнка, “геапалітычная сітуацыя складваецца так”, што ён дамовіўся з Пуціным абараняць іх “агульную айчыну”.
“Айчына ў нас агульная. Але так сталася. Мы з вамі многія былі сведкамі. На гэтай агульнай айчыне ўтварылася паўтара дзясятка самастойных дзяржаў. Ведаеце пра прычыны, як гэта адбывалася ды іншае. І Беларусь заўсёды называлі самай савецкай рэспублікай”, — сказаў ён.
Кожны крок рэжыму Лукашэнкі насустрач Пуціну штурхае Беларусь да растварэння ў РФ — Ціханоўская
2 красавіка, Позірк. Беларусы не выбіралі растварэнне ў РФ, ім не патрэбныя саюзы, праз якія "гінуць людзі і губляецца нацыянальная самабытнасць", заявіла беларускі дэмакратычны лідар Святлана Ціханоўская 2 красавіка, калі ўлады ў Мінску адзначаюць Дзень яднання народаў Беларусі і Расіі. "За гады …
Лукашэнка назваў Беларусь і РФ "агульнай айчынай" для жыхароў дзвюх краін
2 красавіка, Позірк. Мінск і Масква "разам будуюць будучыню", абапіраючыся на "ўзаемны давер і падтрымку", адзначыў Аляксандр Лукашэнка 2 красавіка ў віншаванні з Днём яднання народаў Беларусі і Расіі. Гэты дзень ён лічыць "знакавай для беларусаў і расіян датай", якая стала "сімвалам …