Мінск 06:01

Кожны крок рэжыму Лукашэнкі насустрач Пуціну штурхае Беларусь да растварэння ў РФ — Ціханоўская

Скрыншот: сэрвіс webglearth.com

2 красавіка, Позірк. Беларусы не выбіралі растварэнне ў РФ, ім не патрэбныя саюзы, праз якія “гінуць людзі і губляецца нацыянальная самабытнасць”, заявіла беларускі дэмакратычны лідар Святлана Ціханоўская 2 красавіка, калі ўлады ў Мінску адзначаюць Дзень яднання народаў Беларусі і Расіі.

“За гады існавання дагавора аб Саюзнай дзяржаве мы зноў і зноў чуем пра новыя пагадненні паміж Расіяй і Беларуссю, — напісала палітык у сваім тэлеграм-канале. — Толькі за апошнія паўгода мы сутыкнуліся з размеркаваннем беларускіх выпускнікоў у Расію, дагаворам аб гарантыях бяспекі і сумеснымі вайсковымі вучэннямі “братэрскіх народаў”. Адзін дыктатарскі рэжым трымаецца за іншы, як за адзіную апору сваёй улады. І расплачваецца за гэты саюз незалежнасцю, свабодай і чалавечымі жыццям”.

“Пад маркай “брацкага народа” прапаганда хлусіць пра бяспеку, стабільнасць і агульную культуру — пакуль за акном працягваюцца вайна, рэпрэсіі і поўнае падпарадкаванне нашай краіны інтарэсам Крамля”, — дадала яна.

Паводле слоў Ціханоўскай, рэжым Аляксандра Лукашэнкі “настроіў супраць сябе кожнага суседа, акрамя аднаго, і больш не мае выбару, акрамя як ісці за ім ва ўсім”. “Кожны крок, які рэжым робіць насустрач [прэзідэнту РФ Уладзіміру] Пуціну, штурхае Беларусь да растварэння ў Расіі”, — падкрэсліла палітык.

Беларусам усё гэта не патрэбна, перакананая Ціханоўская. “Мы ўжо не раз паказвалі, што можам ствараць мастацкія шэдэўры, што становяцца вядомымі на ўвесь свет. Будаваць эканоміку, якая не залежыць ад крэдытаў. Самастойна гадаваць і выхоўваць новых навукоўцаў і вынаходнікаў, што працуюць на блага міру і будучыні, а не вайны і прапаганды”, — адзначыла яна.

Дэмлідар заклікала беларусаў перадаваць дзецям нацыянальныя традыцыі і культуру, падтрымліваць беларускіх музыкаў, паэтаў і пісьменнікаў, мастакоў.

“Паверце, ніводны саюз на свеце не варты таго, каб усё гэта страціць”, — падсумавала Ціханоўская.

2 красавіка 1996 года першы прэзідэнт РФ Барыс Ельцын і Аляксандр Лукашэнка падпісалі дагавор аб стварэнні супольнасці Беларусі і Расіі, а 2 красавіка 1997-га — дагавор аб Саюзе Беларусі і Расіі. 23 траўня 1997 года быў прыняты статут саюза. 8 снежня 1999 года падпісаны дагавор аб стварэнні Саюзнай дзяржавы, які набыў моц 26 студзеня 2000 года.

Расія пачала фарсіраваць тэму інтэграцыі з Беларуссю ў снежні 2018 года. Дзмітрый Мядзведзеў, які на той момант займаў пасаду прэм’ер-міністра РФ, фактычна ўвязаў максімальнае збліжэнне дзвюх краін з далейшай падтрымкай Мінска з боку Масквы.

Працэс актывізаваўся пасля таго, як Расія падтрымала Лукашэнку на хвалі поствыбарных пратэстаў 2020 года, а таксама пасля пачатку поўнамаштабнай вайны РФ супраць Украіны ў лютым 2022-га, у якой афіцыйны Мінск падтрымлівае Крэмль.

На пасяджэнні Вышэйшага дзяржсавета Саюзнай дзяржавы ў лістападзе 2021 года Лукашэнка і Пуцін падпісалі дэкрэт, якім зацвердзілі 28 саюзных праграм інтэграцыі. На сумеснай прэс-канферэнцыі 13 сакавіка 2025-га ў Маскве расійскі лідар паведаміў, што “ўсе 28 праграм, якія былі намечаныя, выкананыя на 100%”.

Падчас выступу 14 сакавіка Лукашэнка ў Савеце Федэрацыі РФ Лукашэнка выказаўся супраць найхутчэйшага зліцця дзвюх краін: “Калі Расія ўвойдзе ў склад Беларусі ці, наадварот, Беларусь увойдзе ў склад Расіі? Рабяты, гэта наўрад ці будзе ў бліжэйшы час. Калі мы будзем у гэтым плане біцца ў гэтыя адчыненыя дзверы, мы загубім усё, што мы зрабілі. Трэба ісці спакойна, step by step, крок за крокам, нешта рэалізоўваючы, як мы”.

Паводле слоў спікера, у цяперашняй сітуацыі “з устаноўкамі, як у Савецкім Саюзе, падыходзіць нельга”, гэты “момант упушчаны”. Разам з тым, адзначыў Лукашэнка, “геапалітычная сітуацыя складваецца так”, што ён дамовіўся з Пуціным абараняць іх “агульную айчыну”.

“Айчына ў нас агульная. Але так сталася. Мы з вамі многія былі сведкамі. На гэтай агульнай айчыне ўтварылася паўтара дзясятка самастойных дзяржаў. Ведаеце пра прычыны, як гэта адбывалася ды іншае. І Беларусь заўсёды называлі самай савецкай рэспублікай”, — сказаў ён.

Лукашэнка назваў Беларусь і РФ "агульнай айчынай" для жыхароў дзвюх краін

2 красавіка, Позірк. Мінск і Масква "разам будуюць будучыню", абапіраючыся на "ўзаемны давер і падтрымку", адзначыў Аляксандр Лукашэнка 2 красавіка ў віншаванні з Днём яднання народаў Беларусі і Расіі. Гэты дзень ён лічыць "знакавай для беларусаў і расіян датай", якая стала "сімвалам …
Падзяліцца: