“Экстрэмісцкім фарміраваннем” прызнаны праект “Belarusiana”

14 траўня, Позірк. “Экстрэмісцкім фарміраваннем” паводле рашэння Міністэрства ўнутраных спраў ад 13 траўня прызнаны праект “Belarusiana”. Змены ўнесеныя 14 траўня ў адпаведны пералік на сайце ведамства.

Датычнымі да “фарміравання” названыя Яраслаў Грыгор’еў і Мечыслаў Дабранскі.

“Belarusiana” — старонка ў “Інстаграме” з больш чым 3 тыс. падпісчыкаў, пазіцыянуе сябе як “бяспечную прастору для нацыяналістаў і іншых нашых”. На старонцы публікуюцца гумарыстычныя мемы і карцінкі з палітычным падтэкстам.

Усяго ў спісе “экстрэмісцкіх фарміраванняў” на момант унясення змяненняў пазначаныя 408 пазіцый і 370 арганізацый. Рэальная колькасць арганізацый на 15 меншая з улікам паўтораў.