Большасць выгнаных беларускіх палітвязняў у Польшчы атрымала міжнародную абарону — АПК

14 траўня, Позірк. Па стане на 8 мая з 89 спраў былых беларускіх палітычных зняволеных аб наданні міжнароднай абароны ў Польшчы вынесены 63 рашэнні, 26 спраў знаходзяцца на разглядзе, паведамляецца ў тэлеграм-канале Аб’яднанага пераходнага кабінета са спасылкай на кіраўніка Упраўлення па справах іншаземцаў Польшчы Томаша Цытрыновіча.

Такім чынам, большасць атрымалі статус.

“Сумесна з праваабарончымі арганізацыямі на працягу некалькіх месяцаў мы вядзем актыўную працу з польскімі ўладамі па пытаннях, звязаных з легалізацыяй былых палітычных зняволеных, якіх рэжым [Аляксандра] Лукашэнкі дэпартаваў з Беларусі ў другой палове 2025 года”, — заявіў намеснік кіраўніка Аб’яднанага пераходнага кабінета Павел Латушка.

Латушка як член рабочай групы па пытаннях, звязаных з знаходжаннем грамадзян Беларусі ў Польшчы, створанай пры МУС Польшчы, запэўніў, што “і надалей будзе весціся праца”, “каб усе дэпартаваныя былыя палітычныя зняволеныя атрымалі статус міжнароднай абароны на тэрыторыі Польшчы і іншых еўрапейскіх дзяржаў”.

23 сакавіка Латушка абмеркаваў з Цытрыновічам пытанні легалізацыі на тэрыторыі Польшчы 83 палітвязняў, вызваленых і выдвараных на тэрыторыю Украіны.

Таксама гаворка ішла пра легалізацыю трох вызваленых палітвязняў, якія былі высланыя ў Літву сёлета 19 сакавіка і праз два дні са згоды польскіх уладаў уехалі на тэрыторыю Польшчы для наступнай легалізацыі.

13 снежня 2025 года ў рамках дамоўленасцяў паміж Мінскам і Вашынгтонам Лукашэнка вызваліў 123 чалавекі (110 грамадзян Беларусі і 13 замежнікаў) з умовай іх наступнага ад’езду з краіны.

109 беларусаў і пяць украінцаў прыбылі на тэрыторыю Украіны. Яшчэ адзін палітвязень, лаўрэат Нобелеўскай прэміі міру, кіраўнік праваабарончага цэнтра “Вясна” Алесь Бяляцкі быў высланы ў Літву.

Група з 89 палітвязняў у ноч на 18 снежня прыбыла з Украіны ў Варшаву.

Сярод прыбылых у польскую сталіцу былі Марыя Калеснікава і Віктар Бабарыка, якія пасля з’ехалі ў Германію.

20 чалавек прыехала ў Вільнюс.

У выніку сустрэчы з амерыканскай дэлегацыяй 19 сакавіка ў Мінску Аляксандр Лукашэнка памілаваў 250 вязняў, з якіх 235 засталася ў Беларусі, а 15 вывезеныя ў Літву. Наўзамен ЗША паабяцалі скасаваць шэраг сваіх санкцый, у тым ліку супраць “Белінвестбанка”, “Банка развіцця”, Міністэрства фінансаў.

Гл. таксама:

Распачатая працэдура легалізацыі ў Польшчы 79 вывезеных экс-палітвязняў — АПК

Латушка: Важна паскорыць легалізацыю дэпартаваных экс-палітвязняў