22 нелегала, пашкодзіўшы загароду на мяжы з Беларуссю, трапілі ў Польшчу — прэс-сакратар МУС

5 красавіка, Позірк. Колькасць замежнікаў, якія спрабуюць нелегальна трапіць у Польшчу з тэрыторыі Беларусі, у апошні час расце, заявіў 5 красавіка прэс-сакратар польскага міністра ўнутраных спраў і адміністрацыі Яцэк Дабжыньскі.

“Учора група з 22 чалавек, пашкодзіўшы тэхнічную загароду, пранікла ў Польшчу, — напісаў ён на сваёй старонцы ў сацыяльнай сетцы Х. — Новым момантам з’яўляецца тое, што 5 чалавек засталіся на беларускім баку і, кідаючы камяні ў польскія патрулі, адначасова здымалі на відэа нелегальнае перасячэнне мяжы. Не выключана, што беларуская прапаганда і арганізатары гэтага працэсу выкарыстаюць запісы для сцвярджэння, што мяжу нашай дзяржавы можна лёгка пераадолець”.

“Аднак насамрэч спробы нелегальнага перасячэння мяжы, як відаць на запісе з відэаназірання, хутка і эфектыўна спыняюцца. Праходу няма. Польская мяжа непраходная. Тысячы салдат, памежнікаў і паліцэйскіх, камеры і дроны ахоўваюць кожны метр 24 гадзіны на суткі”, — заявіў Дабжыньскі.

Ад пачатку года, паводле падлікаў “Позірку”, Польшча спыніла не менш як 4,1 тыс. спробаў незаконнага перасячэння мяжы з беларускай тэрыторыі. Дэталёвы аналіз абцяжараны ў сувязі з тым, што Памежная ахова ў апошнія месяцы публікуе прыблізныя лічбы, якія разыходзяцца з данымі іншых краін Еўрасаюза побач з Беларуссю.

Служба аховы дзяржаўнай мяжы Літвы прадухіліла 221 такую ​​спробу, Дзяржаўная памежная ахова Латвіі — 476.

За 2024 год Літва, Латвія і Польшча прадухілілі 36,3 тыс. спробаў незаконнага пранікнення мігрантаў з беларускай тэрыторыі.

Міграцыйны крызіс на мяжы Беларусі і краін Еўрасаюза цягнецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.

Аляксандр Лукашэнка неаднаразова заяўляў, што беларускія пагранічнікі не будуць спыняць нелегальных мігрантаў, якія накіроўваюцца ў Еўрасаюз праз Беларусь, таму што іх туды “паклікалі”.