Белгідрамет: У сувязі з рэзкім пахаладаннем аграметэаралагічная сітуацыя прыкметна пагоршылася і не палепшыцца ў бліжэйшы час

8 красавіка, Позірк. “У сувязі з рэзкім пахаладаннем аграметэаралагічная сітуацыя на тэрыторыі Беларусі прыкметна пагоршылася”, — паведаміў Белгідрамет 8 красавіка.

“Халоднае надвор’е прыпыніла развіццё азімых культур і адрастанне шматгадовых траў, умовы для правядзення палявых работ складваюцца неспрыяльна. Тэмпература глебы на глыбіні 10 см ніжэй за аптымальную для яравой сяўбы. Ва ўсходняй палове Беларусі на палях утварылася снежнае покрыва. Пад уплывам адмоўных тэмператур паветра верхні пласт глебы падмярзае”, — адзначаюць сіноптыкі.

Паводле іх інфармацыі, у бліжэйшы час аграметэаралагічныя ўмовы не палепшацца. “У заходняй частцы рэспублікі, дзе снежнае покрыва адсутнічае, нізкія начныя тэмпературы паветра месцамі могуць прадстаўляць небяспеку для сельскагаспадарчых культур. У паўднёвых раёнах пацерпяць раннія костачкавыя культуры, у якіх пачалося красаванне“, — прагназуе Белгідрамет.

Пасля анамальна цёплых сакавіка і першых дзён красавіка ў краіне ўсталявалася зімовае надвор’е з начнымі маразамі да -10 градусаў і снегападамі. Вышыня снежнага покрыва месцамі перавышае 20 см. У ноч на 11 красавіка па ўсходзе чакаецца да 12 градусаў ніжэй за нуль.