У Магілёве 15–17 красавіка правераць сістэму апавяшчэння, могуць гучаць сірэны
15 красавіка, Позірк. У рамках вучэнняў па грамадзянскай абароне 15–17 красавіка ў Магілёве правераць сістэму апавяшчэння, паведамляе прэс-служба Магілёўскага аблвыканкама.
Адзначаецца, што магчымае ўключэнне гукавых сірэн і рассыланне СМС-паведамленняў ад Міністэрства па надзвычайных сітуацыях.
“Просьба захоўваць спакой, ніякіх дзеянняў рабіць не трэба”, — заклікалі мясцовыя ўлады.
8 красавіка “тэхнічную праверку сістэмы апавяшчэння насельніцтва з запускам электрасірэн” правялі ў Брэсцкай вобласці. 30 студзеня і 20 сакавіка аналагічныя праверкі праводзіліся ў Гомельскай вобласці.
13 сакавіка планавая праверка сістэмы апавяшчэння прайшла па ўсёй Беларусі. У эфіры FM-радыёстанцый транслявалася паведамленне: “Увага! Праводзіцца тэхнічная праверка сістэмы апавяшчэння. Тэхнічная праверка завершана”.
Летась штогадовая праверка аўтаматызаванай сістэмы цэнтралізаванага апавяшчэння (АСЦА) адбылася 21 сакавіка пры ўдзеле “суб’ектаў сістэмы абвесткі” — Белтэлерадыёкампаніі, тэлеканалаў АНТ і СТБ, кампаніі “Белтэлекам”.
АСЦА прызначаная для таго, каб інфармаваць жыхароў, органы ўлады, а таксама структуры сістэмы грамадзянскай абароны, папярэджання і ліквідацыі НС пра пагрозу або ўзнікненне надзвычайных сітуацый прыроднага і тэхнагеннага характару, ход іх ліквідацыі, правілы паводзінаў насельніцтва ў гэтых умовах.
Звычайна сістэма запускае перадачу сігналу “Увага ўсім!” з дапамогай электрасірэн і сістэм гучнагаварыцельнай сувязі; маўленчай інфармацыі па гучнагаварыцелях; перахапляе сігналы тэле- і радыёканалаў (FM), якія вяшчаюць па ўсёй краіне, у абласных або раённых цэнтрах; уключае інфармацыйны бягучы радок у эфіры рэспубліканскіх тэлеканалаў; ініцыюе рассылку кароткіх паведамленняў з папярэджаннем абанентам сотавай сувязі.
Пра прычыны такіх частых праверак сістэм апавяшчэння МНС не паведамляе. Разам з тым звяртае на сябе ўвагу той факт, што за выключэннем Магілёўскай вобласці гэта адбывалася ў абласцях, якія мяжуюць з Украінай, куды рэгулярна ўрываюцца беспілотныя лятучыя апараты, якія, як мяркуецца, належаць Расіі. У Беларусі зафіксавана некалькі выпадкаў падзення дронаў на будынкі.
Ад пачатку поўнамаштабнай вайны праверкі сістэмы апавяшчэння сістэматычна праходзяць, напрыклад, у Літве, Польшчы, Чэхіі. Для гэтага выкарыстоўваюцца рэпрадуктары на вуліцах, праз якія перадаецца паведамленне і гучыць сірэна.