У выпадку агрэсіі НАТО супраць Беларусі і Расіі першымі пацерпяць Польшча і краіны Балтыі, заявіў кіраўнік СЗВ РФ
Кіраўнік СЗВ РФ Сяргей Нарышкін у Мінску (15 красавіка 2025 года)
15 красавіка, Позірк. У выпадку магчымай агрэсіі НАТО супраць Беларусі і Расіі першымі пацерпяць Польшча і краіны Балтыі, заявіў журналістам дырэктар Службы знешняй выведкі (СЗВ) РФ Сяргей Нарышкін, які 15 красавіка знаходзіцца ў Мінску.
“Яны павінны б зразумець, але пакуль не разумеюць, што ў выпадку агрэсіі з боку Паўночнаатлантычнага альянсу супраць Саюзнай дзяржавы ўрон будзе нанесены, безумоўна, усяму блоку НАТО, але ў большай ступені першымі, хто пацерпіць, будуць носьбіты такіх ідэй сярод палітычных колаў Польшчы і прыбалтыйскіх краін”, — цытуе чыноўніка агенцтва ТАСС.
Паводле яго сцвярджэння, Польшча і краіны Балтыі “выбіваюцца высокай агрэсіўнасцю, ва ўсялякім разе на словах, увесь час бразгаюць зброяй”.
“Польшча дайшла да таго, што заяўляе пра свае планы ўсталяваць уздоўж межаў з Беларуссю і Калінінградскай вобласцю РФ каля 2 мільёнаў супрацьтанкавых мін і вельмі хацела б, разлічвае і спадзяецца атрымаць яшчэ і амерыканскую ядзерную зброю”, — сказаў Нарышкін. Як размяшчэнне супрацьтанкавых мін, прызначаных для абароны, дэманструе “агрэсіўнасць”, ён не патлумачыў.
“Яны ніяк не могуць зразумець, што менавіта нарошчванне вайсковай актыўнасці каля межаў Расіі і Беларусі стала адным з фактараў, адной з прычын цяперашняга вялікага, вострага і вельмі небяспечнага крызісу на Еўрапейскім кантыненце”, — сцвярджае прадстаўнік краіны, якая ў 2022 годзе распачала поўнамаштабную агрэсію супраць Украіны, што стала найбуйнейшым канфліктам у Еўропе з часоў Другой сусветнай вайны.
Нарышкін паведаміў, што на сустрэчы з Аляксандрам Лукашэнкам абмяркоўваў “шэраг пытанняў, якія тычацца рэгіянальнай, глабальнай бяспекі”.
“Аляксандр Рыгоравіч падтрымаў і заўсёды падтрымлівае сумесную дзейнасць спецслужбаў нашых дзвюх дзяржаў па забеспячэнні інтарэсаў, гарантаванні бяспекі нашых дзяржаў, Саюзнай дзяржавы Расіі і Беларусі, гарантаванні бяспекі грамадзян нашых дзвюх краін”, — адзначыў спікер.
Паводле яго слоў, у Магілёве пройдзе сумеснае пасяджэнне калегій СЗВ РФ і КДБ Беларусі.
Гл. таксама:
Лукашэнка ў Мінску абмяркоўвае з кіраўніком выведкі РФ Нарышкіным “шэраг палітычных пытанняў”
