Пры ўездзе з Літвы ў Беларусь затрыманы мужчына на аўтамабілі са змененым VIN-нумарам

21 красавіка, Позірк. Пры ўездзе з Літвы ў Беларусь праз пункт пропуску Каменны Лог 20 красавіка праз праблемы з транспартным сродкам затрымалі беларускага грамадзяніна, вынікае з паведамлення Дзяржаўнага пагранічнага камітэта.

Паводле інфармацыі ведамства, пагранічны нарад высветліў, што ідэнтыфікацыйны нумар кузава мікрааўтобуса “Фальксваген”, на якім ехаў мужчына, “мае прыкметы змянення”.

Кіроўца паведаміў, што “машыну пераганяў праз мяжу на просьбу знаёмага і мусіў пакінуць яе на паркоўцы”. Каму належыць транспарт, мужчына, паводле яго слоў, не ведаў, пра праблемы з VIN-нумарам “не падазраваў”.

“Транспартны сродак канфіскаваны супрацоўнікамі органаў пагранічнай службы. У дачыненні да кіроўцы распачатая даследчая праверка ў рамках Крымінальна-працэсуальнага кодэкса”, — заявіў Дзяржпагранкамітэт.

Апублікаваныя ведамствам фатаграфіі сведчаць, што на мікрааўтобусе былі рэгістрацыйныя нумарныя знакі Казахстана.

Раней Дзяржпагранкамітэт паведамляў, што 20 студзеня ў тым жа пункце пропуску быў затрыманы грамадзянін Беларусі з аналагічнай праблемай. Заяўлялася, што мужчына набыў транспарт, зарэгістраваны ў Казахстане праз уведзеныя Літвой забароны ў дачыненні да аўто на беларускіх нумарах. Пра праблемы з VIN-нумарам, ён, як сцвярджалася, не падазраваў.

Суседнія краіны Еўрасаюза пачалі ўзмацняць палітыку знаходжання на сваёй тэрыторыі зарэгістраванага ў Беларусі транспарту неўзабаве пасля таго, як 29 чэрвеня 2024 года Савет ЕС прыняў новыя абмежавальныя меры ў сувязі з удзелам рэжыму Аляксандра Лукашэнкі ў агрэсіі РФ супраць Украіны. Сярод іншага была пашыраная забарона на перавозку грузаў аўтатранспартам па тэрыторыі ЕС прычэпамі і паўпрычэпамі з беларускай рэгістрацыяй, у тым ліку пры перавозцы грузавікамі, зарэгістраванымі не ў Беларусі.