Беларускі комік Камісаранка пазбаўлены грамадзянства Расіі з ініцыятывы ФСБ

23 красавіка, Позірк. Народжаны ў Мінску Вячаслаў Камісаранка і ўраджэнец Адэсы Дзмітрый Раманаў пазбаўленыя расійскага грамадзянства з ініцыятывы Федэральнай службы бяспекі (ФСБ) РФ, паведамляе прэс-служба гэтага ведамства.

Адзначаецца, што “артыстам камедыйнага жанру стэндап” забаронены ўезд у Расію.

Паводле інфармацыі ФСБ, Камісарэнка абвешчаны ў міждзяржаўны вышук паводле падазрэння ў здзяйсненні злачынства ў адпаведнасці з арт. 367 КК Беларусі (паклёп у дачыненні да прэзідэнта). “Баючыся экстрадыцыі, выехаў на тэрыторыю Украіны, дзе публічна заяўляў пра незаконны крымінальны пераслед”, — гаворыцца ў паведамленні.

Раманаў, які таксама пакінуў РФ, паводле сцвярджэння ведамства, “працаваў валанцёрам у польскім штабе па прыёме бежанцаў з Украіны і на пункце сартавання гуманітарнай дапамогі для ўзброеных сіл Украіны”.

“У ходзе сваіх канцэртаў на тэрыторыі краін Еўрапейскага саюза выступаюць супраць правядзення спецыяльнай ваеннай аперацыі (так расійскія і беларускія ўлады называюць развязаную РФ поўнамаштабную вайну супраць Украіны. — “Позірк”.), транслююць ідэі пра неабходнасць падрыву асноў канстытуцыйнага ладу Расіі. Дзеянні Раманава і Камісаранкі ствараюць пагрозу нацыянальнай бяспецы Расіі”, — заяўляе ФСБ.

15 жніўня 2024 года ў дачыненні да Камісаранкі ў Беларусі была распачатая спецыяльная вытворчасць.

Летась 30 снежня Мінскі гарадскі суд завочна прыгаварыў мужчыну да 6 гадоў пазбаўлення волі паводле ч. 1 арт. 130 (распальванне расавай, нацыянальнай, рэлігійнай або іншай сацыяльнай варожасці або варажнечы), ч. 2 арт. 367, ч. 1 арт. 368 (абраза прэзідэнта) Крымінальнага кодэкса.

Комік часта жартуе з Аляксандра Лукашэнкі і яго палітыкі.

Пасля выступу ў Турцыі прадстаўнік МУС гэтай краіны папрасіў перадаць Камісаранку, што не трэба жартаваць пра турэцкіх вышэйшых службовых асобаў.

У Беларусі Камісаранка ўнесены ў спісы “экстрэмістаў” і “тэрарыстаў”.